Asociacioni i Gazetarëve të Kosovës (AGK) në bashkëpunim me Misionin e OSBE-së në Kosovë (OSBE) dhe Entitetin e Organizatës së Kombeve të Bashkuara për Barazi Gjinore dhe Fuqizim të Grave, kanë bërë ndarjen e katër çmime të gazetarisë, raporton Ekonomia Online.

Jeta Xharra dhe Visar Prebreza nga Kallxo, u shpërblyen me Çmimin e Gazetarisë për Ekonomi “Ibrahim Rexhepi”.

Dy çmimet për Storjet më të mira për Pandeminë, i fituan gazetarja e Radio Televizionit të Kosovës, Jehona Zhitia dhe gazetarja e Klan Kosova, Arbreshë Uka.

Ndërsa, për Çmimin e Gazetarisë për Fuqizimin e Gruas, u shpërblye Donika Lamaxhema për storjen e saj të publikuar në Kosovo2.0, çmim ky i ndarë dhe i mbështetur nga Shefja e Zyrës së UN Women në Kosovë, Vlora Tuzi Nushi.

Ceremonia e ndarjes së çmimeve vjetore të gazetarisë u moderua nga kryetarja e AGK-së, Gentiana Begolli-Pustina, e cila ndër të tjera shprehu mirënjohje për kolegët për përkushtimin e dhënë gjatë këtij viti.

“Fatëkeqsisht me ulëse të pakta në një ambient shumë më të zbehtë se siç jemi mësuar të shohim më herët në raste të tilla, ne po fillojmë ndarjen e këtyre çmimeve tashmë tradicionale vjetore që kanë të bëjnë me Çmimin për Ekonomi “Ibrahim Rexhepi” dhe Çmimin për Fuqizimin e Gruas. Ndonëse jemi mësuar që këto çmime të sjellin gëzim dhe optimizëm meqë vlerësojnë punën vjetore të gazetarëve që bëjnë në tema të caktuara, fatkeqsisht sot nuk i kemi të gjithë fituesit në mesin tonë, meqë njëra nga ta gjendet e karantinuar. Kjo dëshmon më së miri që kolegët tanë rrezikuan shëndetin e tyre e të familjes që ta përmbushin jo vetëm detyrën, por misionin e tyre, e që është informimi i saktë dhe i shpejtë”.

Të pranishmëve përmes një video iu adresua edhe ambasadori Jahn Braathu, i cili përgëzoi gazetarët për punën e tyre.

“Ne përgëzojmë gazetarët që vëzhgojnë shpenzimin e parasë publike dhe shërbejnë si mbikëqyrës të ngjarjeve që formësojnë ndërveprimet midis ekonomisë, politikës dhe shoqërisë në Kosovë. Për më tepër, unë mendoj se kemi nevojë për më shumë raportim ekonomik në Kosovë. Raportim ekonomik jo vetëm për gjërat që duhet të bëhen më mirë, por edhe për disa nga gjërat që tashmë janë bërë mirë, pra, ato në të cilat shohim se është bërë progres, për shembull në sektorin privat. Pandemia gjithashtu ka sjellur sfidat e saj për komunitetin e medieve në Kosovë. Sidoqoftë, disa nga këto sfida janë sfida me të cilat gazetarët janë përballur për një kohë të gjatë. Nuk janë aspak risi. Si të tilla, ato kontribuojnë në një përshkallëzim që ilustron se sa e vështirë është të ofrohen informacione të sakta me shpejtësi për publikun e gjerë”, tha ai.

Gazetarët u falënderuan edhe nga Shefja e Zyrës së UN Women në Kosovës, Vlora Tuzi Nushi.

“Njëjtë sikur mjekët, gazetarët kanë luajtur një prej roleve më të rëndësishme në shpëtimin e jetëve sepse po të mos kishim pranuar informata nga ju, nuk do të dinim si të kujdesemi apo çfarë po ndodhë sepse të gjithë ishim të izoluar pa njohuri për rrezikun e madh, i cili na është kanosur. E çmoj punën tuaj në terren dhe sfidat me të cilat jeni ballafaquar, aq më shumë duke i pas parasysh ndryshimet politike që ndodhën, pra, ishit pikërisht në front”, tha ajo.

Ceremonia e ndarjes së çmimeve ëhstë mbajtur në nder të Ditës Botërore të Lirisë së Shtypit, e cila shënohet më 3 maj çdo vit në mbarë botën, por për shkak të situatës me pandeminë në vend, organizimi është zhvendosur në nëntor të këtij viti.