Aleanca Kosovare e Bizneseve (AKB) ka reaguar ashpër pas thirrjes së Sekretarit Organizativ të Vetëvendosjes, Alim Rama, për bojkotimin e produkteve vendore të kompanive të Devollëve. Kryetari i AKB-së, Agim Shahini, në një prononcim për Kosova.info, e ka quajtur këtë qasje të papranueshme dhe të dëmshme për ekonominë e vendit.

“Thirrjet për bojkotimin e produkteve vendore janë të papranueshme dhe dëmtojnë drejtpërdrejt ekonominë tonë, punëtorët tanë dhe të ardhmen e vendit. Askush, e aq më pak një përfaqësues politik, nuk guxon ta godasë sektorin privat – motorin e vetëm të zhvillimit ekonomik të Kosovës”, u shpreh Shahini.

Ai theksoi se kompanitë vendore, si ato të Devollëve, janë ndër kontribuuesit më të mëdhenj në ekonominë kosovare duke krijuar mijëra vende pune dhe duke mbushur arkën e shtetit me qindra miliona euro.

“Slogani ynë është i qartë dhe i fuqishëm: ‘Unë konsumoj produkte vendore, po ju?’. Prandaj ftoj qytetarët e Kosovës që të rrisin konsumimin e produkteve tona, e jo t’i bojkotojnë ato,” shtoi ai.

Shahini përmbylli reagimin e tij duke theksuar se patriotizmi sot nuk matet me fjalë, por me veprime konkrete që forcojnë ekonominë dhe shtetin. “Patriotizmi sot matet me mbështetje për ekonominë tonë vendore,” theksoi ai.