Juventusi është gati të marrë në huazim Zion Suzukin nga Paris Saint-Germain, pasi klubi francez ka arritur marrëveshje me Parman për transferimin e tij për 30 milionë euro plus bonuse, por japonezi raportohet se do të jetë vetëm një zgjidhje e përkohshme, deri në momentin kur Alisson Beckeri të mund të largohet nga Liverpooli si lojtar i lirë.

Disa burime kanë konfirmuar sot, përfshirë “L’Equipe”, “Sky Sport Italia”, “Sportitalia” dhe “La Gazzetta dello Sport”, se PSG është pranë përfundimit të detajeve të marrëveshjes me Parman për transferimin e Suzukit.

Shuma e transferimit do të jetë 30 milionë euro, plus deri në 5 milionë euro të tjera në formën e bonuseve. Këto bonuse lidhen me paraqitjet dhe rezultatet e skuadrës dhe jo me performancën individuale të Suzukit.

Kjo është e rëndësishme, pasi reprezentuesi i Japonisë nuk pritet të luajë për PSG-në këtë sezon.

Në vend të kësaj, ai do të rikthehet menjëherë në Serie A, ku pritet të kalojë një sezon në huazim te Juventusi.

Në pamje të parë duket e çuditshme që Juventusi të pranojë një zgjidhje kaq afatshkurtër, por “Sportmediaset” shpjegon se bardhezinjtë e shohin këtë si një zgjidhje “urë”, deri në momentin kur objektivi i tyre i vërtetë të bëhet i disponueshëm.

Edhe pse Juventusi kaloi pjesën më të madhe të verës duke negociuar me Aston Villan për Emiliano Martinez, portieri që trajneri Luciano Spalletti dëshiron më shumë është Alisson.

Spalletti ka punuar më parë me portierin brazilian te Roma, ku të dy krijuan një marrëdhënie të fortë. 33-vjeçari gjithashtu kishte shfaqur dëshirë për t’u rikthyer në Serie A.

Megjithatë, Liverpooli refuzoi të merrte në konsideratë shitjen e Alissonit, ndaj Juventusi është i gatshëm të presë deri në skadimin e kontratës së brazilianit në qershor 2026.

Kështu, Suzuki pritet të jetë zgjidhja e përkohshme e Juventusit, ndërsa klubi italian synon të sigurojë shërbimet e Alisson si lojtar i lirë në të ardhmen.