Ministrja Hykmete Bajrami, priti në takim drejtorin e përgjithshëm të Doganës së Kosovës, Bahri Berishën. Temë e diskutimit ishte thellimi i mëtejmë i bashkëpunimit në mes Ministrisë së Tregtisë dhe Industrisë dhe Doganës së Kosovës në funksion të lehtësimit të tregtisë, luftimit të informalitetit dhe evazionit fiskal si dhe rritjes së kontrollit të cilësisë së karburanteve të naftës të cilat importohen në Republikën e Kosovës.

Ministrja Bajrami, fillimisht, i uroi z. Berisha detyrën e re si Drejtor i Përgjithshëm i Doganës së Kosovës dhe e informoi atë lidhur me angazhimet e MTI-së në përmirësimin e mjedisit afarist, zbatimin e MSA-së, lehtësimin e tregtisë, fuqizimin e punës së inspektoratit të tregut dhe mbrojtjen e konsumatorit. Ajo shprehu gatishmërinë e plotë të Ministrisë së Tregtisë dhe Industrisë për të bashkëpunuar ngushtë me Doganën e Kosovës lidhur me plotësimin e mandatit institucional në funksion të përnmirësimit të situates ekonomike në vendin tonë.

Ministrja Bajrami u ndal edhe te Udhëzimi i ri Administrativ për Cilësinë e Karburanteve të Naftës i nënshkruar së fundmi nga ajo, përmes të cilit kompetencat për kontrollin e cilësisë së naftës së importuar do të ushtrohen nga Dogana e Kosovës në pika kufitare.

Nga ana e tij, Drejtori i Doganës, Bahri Berisha, falënderoi ministren Bajrami për angazhimin e saj dhe të ministrisë që ajo drejton, dhe gatishmërinë e Doganës së Kosovës për të bashkërenduar aktivitetet e përbashkëta me qëllim të zbatimit të suksesshëm të këtij udhëzimi administrativ i cili do të ndikojë ndjeshëm në rritjen e kontrollit të cilësisë së karburanteve që importohen në vendin tonë.