Shtetet anëtare të BE-së dështuan të angazhoheshin për kërkesën e Agjencisë së Kombeve të Bashkuara për Refugjatët që qeveritë të zhvendosin 42,500 afganë që kanë nevojë për mbrojtje gjatë pesë viteve të ardhshme.

Duke folur pas një forumi virtual të organizuar nga BE, Komisionerja Evropiane për Migracionin Ylva Johansson u tha gazetarëve në Bruksel se objektivi është “i realizueshëm”, por që kërkon që vendet anëtare të BE të bëjnë premtime.

Komisioneri i Lartë i OKB-së për Refugjatët Filippo Grandi tha në forum se rreth 85,000 afganë janë në rrezik dhe se ata do të kenë nevojë për mbrojtje gjatë pesë viteve të ardhshme, andaj BE-ja duhet të marrë gjysmën e këtij numri.

Johansson shtoi se përpjekjet për evakuimin nga 27 shteteve anëtare të BE-së kishin qenë të suksesshme – duke vënë në dukje se shtetet e BE-së kishin nxjerrë 22,000 njerëz nga Afganistani që nga marrja e vendit nga talebanët.

Komisioni Evropian po paralajmëron për një “situatë të tmerrshme” në Afganistan.

“Gjysma e popullsisë afgane ka nevojë për ndihmë humanitare dhe ekonomia është në rrezik të kolapsit total”, tha komisioneri Johansson.

Komisioni i BE-së parashtroi një propozim në forum për një skemë mbështetëse shumëvjeçare për afganët në rrezik. Detaje të mëtejshme se çfarë saktësisht mund të përfshijë ai plan nuk u dhanë.

Komisionerja thotë se ajo po krijon gjithashtu një task forcë speciale dhe do të presë forume të rregullta mbi zhvendosjen nga Afganistani.

BE beson se pothuajse 664,000 afganë janë zhvendosur brenda vendit në vend që nga fillimi i këtij viti, përveç 3 milionë njerëzve që tashmë ishin zhvendosur brenda vendit deri në fund të vitit 2020.

Gjatë fjalimit të saj vjetor të gjendjes së Bashkimit Evropian në shtator, Presidentja e Komisionit Evropian Ursula von der Leyen tha se blloku do të siguronte një shtesë prej 100 milionë eurosh si pjesë e një Pakete të re të zgjeruar të Mbështetjes Afgane, duke sjellë shumën totale të ndihmës humanitare të BE-së në 300 milionë euro.

Rivendosja e refugjatëve dhe emigrantëve ka qenë një nga betejat më të mëdha mes Brukselit dhe shteteve anëtare të BE-së që nga fillimi i krizës së migrimit më 2015, shkruan DW, transmeton Klankosova.tv.

Gjermania, për shembull, ka pranuar mbi 1 milion azilkërkues nga Siria në vitet pasuese.

“Krahasuar me sfidën e madhe që kemi zotëruar më 2015, edhe 85,000 njerëz nga Afganistani nuk janë shumë. Kjo ka të bëjë me njerëzimin dhe besueshmërinë tonë”, tha Hannah Neumann, një eurodeputete e Partisë së Gjelbër Gjermane.

Që nga fillimi i evakuimit nga Afganistani, vendet anëtare të BE-së e kanë bërë të qartë se përparësia e tyre është të ndihmojnë vendet fqinje të Afganistanit të presin njerëz të zhvendosur.

Një deklaratë e 31 gushtit pas një takimi të ministrave të brendshëm të BE tha: “BE duhet të forcojë mbështetjen për vendet në afërsi të Afganistanit për të siguruar që ata në nevojë të marrin mbrojtje adekuate kryesisht në rajon”.

Kjo bëri që një numër i OJQ-ve të akuzojnë BE-në për dhënien e përgjegjësive të saj për të mbrojtur njerëzit që kishin mbështetur synimet e BE-së në Afganistan.