Ministri i Arsimit, Shkencës dhe Teknologjisë, Shyqiri Bytyqi, përmes një postimi në rrjetin social “Facebook” ua ka uruar të gjithë mësueseve Ditën Botërore të Mësuesit.

Ndër të tjera, ministri ka shkruar se  roli i mësuesit është gjithmonë më i rëndësishmi.

Postimi i plotë i ministrit Bytyqi:

“Sot, në Ditën Botërore të Mësuesit, kujtojmë gjithë rrugëtimin e mësuesve tanë në zhdukjen e analfabetizmit, në arritjen deri te liria, në bërjen e shtetit të Kosovës.

Pra, roli i mësuesit është gjithmonë më i rëndësishmi! Profesioni i mësuesit është i shenjtë!
Dhe, kjo ditë që shënohet në mbarë botën për ta vënë në vëmendjen tonë rolin e mësuesit, Kosovën e gjeti me një risi, pikërisht që ka të bëj me ngritjen në karrierë të mësuesve. Para pak ditësh filloi procesi i Vlerësimit të Performancës së Mësimdhënësve.
Ne zotohemi se do të krijojmë gjithmonë mundësi të reja, që mësuesit tanë të jenë gjithmonë të përgatitur dhe në nivelin e detyrës!