Edhe pse me probleme shëndetësore nga të cilat vuan prej kohësh, këngëtarja Celine Dion ka njoftuar dhjetë koncerte shtesë në Paris, për shkak të kërkesës së madhe për shfaqjet e saj në vitin 2026.

Datat e reja në Paris La Défense Arena janë planifikuar për në maj 2027 dhe u drejtohen kryesisht fansave që ishin regjistruar për para-shitjen e biletave të vitit 2026, por nuk mundën të merrnin bileta.

Shfaqjet e reja do të zhvillohen më 8, 12, 14, 15, 19, 21, 22, 26, 28 dhe 29 maj 2027.

Kompanitë organizuese Concerts West/AEG Presents dhe Inter Concerts njoftuan se biletat do të jenë të disponueshme përmes pikave të posaçme të shitjes, të destinuara për tifozë të përzgjedhur që ishin regjistruar tashmë për para-shitjen.

Seria e koncerteve “Celine Dion Paris 2026-2027” do të përfshijë disa nga hitet më të mëdha të artistes si në frëngjisht ashtu edhe në anglisht, në një program kushtuar këngëve që kanë shënuar shumë vite karrierë ndërkombëtare.

Drejtimi krijues i prodhimit është marrë nga dizajneri i spektaklit, fitues i çmimeve, Willo Perron.

Siç u theksua në njoftim, paraqitjet në Paris synojnë të jenë një nga ngjarjet më të rëndësishme muzikore të viteve të ardhshme dhe një ribashkim i madh i Celine Dion me publikun e saj, pas problemeve serioze shëndetësore që e mbajtën larg skenës në vitet e mëparshme.

Më konkretisht, artistja mori një pushim nga ngjarjet artistike, pasi në vitin 2022 u diagnostikua me Sindromën e Personit të Ngurtë (Stiff Person Syndrome-SPS).