As përgjimi i dy personave, të cilët dyshoheshin se mund të jenë të infiltruar në vrasjen e ish- kandidatit të PDK-së për deputet të Kuvendit të Kosovës, Elvis Pista, nuk qoi në kapjen e vrasësit.

Organet e hetuesisë ende nuk kanë ndonjë të dyshuar të mundshëm për këtë rast, mirëpo është bërë identifikimi i disa dëshmitarëve të ri, që mund të ndihmojnë në zbardhjen e këtij rasti.

Prokurori i rastit, Ali Uka, i ka thënë se deri tash ende nuk ka asgjë definitive në këtë rast.

“Ka përfunduar përgjimi i dy personave që dyshoheshin se mund të jenë të involvuar në vrasjen e ish-kandidatit për deputetet të PDK-së, Elvis Pista, por asgjë nuk ka dalë nga këto përgjime”, është shprehur prokurori Uka.

Indeksonline raporton se sipas prokurorit, janë intervistuar edhe disa dëshmitarë të ri nga hetuesit policor dhe prokuroria është në pritje të raportit rreth deklarimeve të tyre.

“Vetëm policia është në njohuri për këta dëshmitarë, unë nuk di asgjë për ta. Policia i ka identifikuar si dëshmitar, ndërkohë jam në pritje të raportit zyrtar se çka kanë thënë këta dëshmitarë në deklaratat e tyre”, ka thënë prokurori Uka.

Elvis Pista është vrarë natën e 15 qershorit të vitit 2014, deri sa po dilte nga restorant “Jaha Petrol” në Rahovec, ku ishte bashkë me bashkëshorten dhe disa miq të tij.

Pista, ishte kandidat i PDK-së për deputet të Kuvendit të Kosovës.

Ndërkohë, janë bërë më shumë se 2 vjet nga vrasja e tij, dhe përkundër që janë intervistuar rreth 90 dëshmitar, vrasësi i tij vazhdon të mbetet mister.