Gjykata e Shkallës së Parë, pranë Gjykatës së Krimeve të Rënda në Romë, ka dënuar me burgim të përjetshëm Mark Antony Samson, i cili në mars të vitit 2025 vrau me thikë ish-të dashurën e tij, 22-vjeçaren Ilaria Sula, dhe më pas hodhi trupin e saj në një humnerë, të mbyllur brenda një qeseje.

Vendimi u shpall nga Gjykata e Tretë e Krimeve të Rënda në Romë, në sallën e gjyqit të burgut Rebibbia. Samson, i cili e kishte pranuar autorësinë e krimit, nuk ishte i pranishëm gjatë shpalljes së vendimit.

Ai akuzohej për vrasje me rrethana rënduese, përfshirë paramendimin, si dhe për fshehjen e kufomës.

Pas shpalljes së vendimit, babai i viktimës, Flamur Sula, deklaroi se drejtësia ishte vënë në vend, por dhimbja e familjes do të mbetet e përjetshme.

“Drejtësia u bë, por burgimin e përjetshëm të vërtetë e kemi ne, unë dhe bashkëshortja ime. Ai ende merr frymë, ndërsa vajza ime nuk merr më frymë. Ky është një moment i rëndësishëm për drejtësinë. Unë gjithmonë kam pasur besim te drejtësia dhe nuk jam braktisur”, u shpreh ai.

Babai i 22-vjeçares përcolli gjithashtu një mesazh për të rinjtë, duke i nxitur të respektojnë njëri-tjetrin dhe të komunikojnë me prindërit e tyre.

“U them miqve të Ilaria-s dhe në përgjithësi të rinjve: respektoni njëri-tjetrin dhe flisni me prindërit tuaj. Mos heshtni”, tha ai.

Edhe nëna e viktimës, Gëzime Sula, e tronditur nga ngjarja, iu drejtua të rinjve me një apel të ndjerë: “Respektoni gratë, duajini ato”.

Më vonë, mes lotësh dhe e mbështetur te bashkëshorti, ajo shtoi: “Tani ajo është në paqe”.

Si ndodhi vrasja e studentes shqiptare:

Ilaria Sula, studente 22-vjeçare, u vra më 25 mars 2025 nga ish-i dashuri i saj, Mark Antony Samson. Sipas hetimeve, ai e goditi tri herë me thikë në fyt.

Pas vrasjes, Samson e futi trupin e saj në një qese dhe e hodhi në një humnerë në zonën e Capranica Prenestina, pranë Romës. Trupi i pajetë i të resë u gjet më 2 prill 2025.

Gjatë marrjes në pyetje, 24-vjeçari pranoi krimin dhe u shpreh se nuk arrinte të shpjegonte se çfarë kishte ndodhur në ato momente.

“Nuk di ta shpjegoj se çfarë më ndodhi. Ishte sikur një perde të më kishte rënë para syve. Ndjeja një përzierje emocionesh negative. Nuk mbaj mend sa herë e godita në fytyrë, por me siguri më shumë se dy herë”, kishte deklaruar ai.

Vendimi me burgim të përjetshëm shënon një moment të rëndësishëm në procesin gjyqësor për vrasjen e Ilaria Sulës, ndërsa familja e saj mbetet përballë dhimbjes së humbjes së vajzës.

Mesazhi i familjes së Ilaria Sulës mbetet i qartë: respekti, dashuria dhe komunikimi janë thelbësorë për të parandaluar dhunën ndaj grave.