Koalicioni i OJQ–ve për Mbrojtjen e Fëmijëve në Kosovë – KOMF, Këshilli për Zhvillim të Qëndrueshëm dhe Komisioni Parlamentar për Shëndetësi dhe Mirëqenie Sociale, kanë mbajtur tryezë diskutimi me temën: “Ndikimi i shërbimeve sociale tek qytetarët në nevojë”, raporton Ekonomia Online.

Ofrues dhe përfitues të shërbimeve sociale si familje strehuese, fëmijë pa kujdes prindëror, ofrues të shërbimeve për fëmijët me aftësi të kufizuar, ofrues të shërbimeve për persona të varur nga narkotikë dhe prindër, folën para përfaqësuesve të Kuvendit, pjesëmarrësve të tjerë dhe mediave për vështirësitë kryesore që ata përballen në përditshmëri sa i përket ofrimit dhe marrjes së shërbimeve sociale. Diskutimi kyç kishte të bënte mbi nevojën për ndërhyrje nga institucionet përmes procedimit të Projektligjit për Shërbimet Sociale dhe Familjare dhe Projektligjit për Financat e Pushtetit Lokal të cilat pritet të sigurojnë qëndrueshmërinë e shërbimeve sociale. Këto të fundit, ende nuk janë miratuar.

Aty u kërkua ndërhyrja e shtetit përmes procedimit të Projektligjit për Shërbimet Sociale dhe Familjare dhe Projektligjit për Financat e Pushtetit Lokal të cilat pritet të sigurojnë qëndrueshmërinë e shërbimeve sociale.

Kryetarja e Komisionit Parlamentar për Shëndetësi dhe Mirëqenie Sociale, Fatmire Mulhaxha-Kollçaku, tha se në kuadër të kompetencave si legjislativ do t’u ofrojë përkrahje KOMF-it.

“Sot nuk kemi një prezencë të madhe të deputetëve, por kam 3 zyrtare të larta të Kuvendit. Merreni prezencën tonë si një shprehje e vullnetit të mirë. Të gjitha të drejtat që burojnë nga Kushtetuta jemi të obliguar t’i kthejmë në ligje, qoftë me plotësim ndryshime, apo çfarëdo forme tjetër”, tha Mullhaxha-Kollçaku.

Ndërsa Behrije Ndrecaj-Gashi, e cila ka strehuar disa fëmijë, kërkoi që të njëjtën ta bëjnë edhe familjet tjera. Gjithashtu, ajo pati një kërkesë ndaj ekzekutivit.

“Që 17 vjet kam pasur 26 fëmijë në strehim, por tash kemi një. Qendra për Punë dhe Mbështetje Sociale na përkrahin me aq sa kanë mundësi. Nuk kemi pasur ndihmë nga askush tjetër dhe ne emër të të gjitha familjeve strehuese bëj thirrje që të na mbështetin pushteti lokal dhe qendror. Do Zoti të mos ketë fëmijë të lënë nga prindërit, por do Zoti të ketë sa më shumë familje strehuese”, tha Beqiri.

Fatmire Musliu tha se si familje strehuese kërkon nga pushteti lokal dhe qendror të njihet statusi i familjeve strehuese.

“Unë deri më tani kam pasur 4 fëmijë në strehim, 4 fëmijë të shëndoshë, prej të cilët 2 prej tyre janë kthyer në familjet biologjike, ndërsa 2 të tjerët janë ende në strehim. Për herë të parë kam dëgjuar në një fushatë sensibilizuese në shkollë. Kisha kërkuar që të bëhet një punë nga niveli qendror dhe lokal që të na njihet statusi për këtë punë që e bëjmë”, tha ajo.

E drejtoresha e Organizatës “Down Syndome Kosova”, Sebahate Beqiri e cila është nënë e një fëmije me down syndrome, ka kërkuar më shumë përkushtim nga institucionet kosovare. Ajo tha se kostoja e një trajtimi për një fëmijë të prekur nga kjo sëmundje, është e lartë.

“Është momenti i fundit që të përcaktojmë punët tona edhe në ligjet në fuqi. Shpesh jam zhveshur nga petku i nënës. Kauza e organizatës sonë prek jo vetëm mua por edhe shumë njerëz të tjerë. Personat me aftësi të kufizuar nuk janë vetëm të fushë sociale. Po ka rëndësi shumë mënyra se si po i japim mesazhet tona. Nuk janë vetëm shërbimet sociale që kanë nevojë, por janë edhe shërbimet tjera, shërbimi i logopedëve, i fizioterapeutëve. Nëse një person merr shërbim 2 herë në muaj, kosto mesatare që ne na kushton është 80 euro”, tha ajo.

“Nëse e bën një vizitë tek një logopedë kushton diku 15-20 euro. Shto këtu faktin se si po mirëmbahen këto ordinanca. Kur një prind nuk e ka informacionin e duhur, ai merr çdo shërbim që u ofrohet. Uroj që ky ligj të procedohet sa më shpejtë. Unë uroj që ligjet që janë të jenë të zbatueshme. Ne kemi mundësi ligjore që shërbimet të cilat ofrohen nga organizatat që janë të licencuara dhe profesionale ka mundësi që këto shërbime të vazhdojnë. Nuk kemi pasur vullnet nga institucionet përgjegjëse. Nuk e mohoj që këto vitet e fundit janë bërë përmirësime në mirëqenien sociale”, tha ajo.