Gjykata Rajonale e Itzehoes në Gjermani ka dënuar me burgim të përjetshëm prindërit e foshnjës katërmuajshe Ashley, pasi i shpalli fajtorë për vrasje me mosveprim dhe keqtrajtim të rëndë të një fëmije nën përkujdesje.

Sipas vendimit të gjykatës, çifti e neglizhoi vajzën për një periudhë të gjatë, duke mos i siguruar ushqim dhe lëngje të mjaftueshme, çka çoi në vdekjen e saj të dhimbshme nga uria, raportojnë mediat gjermane.

Kryetari i trupit gjykues, Johann Lohmann, e cilësoi rastin si një ngjarje që “të lë pa fjalë”, duke theksuar se provat dëshmuan një neglizhencë ekstreme nga ana e të dy prindërve.

Foshnja peshonte vetëm një kilogram

Sipas gjetjeve të gjykatës, Ashley, e lindur në maj të vitit 2025, vdiq pas një periudhe të gjatë kequshqyerjeje. Në momentin e vdekjes, foshnja katërmuajshe peshonte vetëm rreth një kilogram, ndërsa autopsia konfirmoi se shkaku i vdekjes ishte uria si pasojë e kequshqyerjes së rëndë.

Prokuroria argumentoi se prindërit nuk i kishin siguruar vajzës sasinë e nevojshme të ushqimit dhe lëngjeve, duke pranuar me vetëdije rrezikun që kjo mund ta çonte në vdekje.

Ndihma mbërriti shumë vonë

Më 26 shtator 2025, prindërit telefonuan shërbimin e emergjencës dhe policinë në banesën e tyre në Brunsbuttel. Megjithatë, për Ashleyn ishte tepër vonë. Mjeku i urgjencës vetëm konstatoi vdekjen e foshnjës.

Një ditë më vonë, prindërit, të dy 24 vjeç në atë kohë, u arrestuan dhe që prej atëherë qëndruan në paraburgim.

Prindërit u arsyetuan me mbingarkesë

Gjatë procesit gjyqësor, të pandehurit deklaruan se ishin ndier të mbingarkuar nga kujdesi për fëmijët. Babai pretendoi se nuk mbante mend shumë nga periudha para vdekjes së vajzës, duke përmendur probleme psikologjike dhe mungesë mbështetjeje.

Nëna pranoi se kishte vënë re humbjen e madhe të peshës së foshnjës rreth dy javë para vdekjes, por tha se vizitat e planifikuara te mjeku nuk ishin realizuar. Të dy pretenduan se në fillim kishin besuar se zhvillimi i vajzës ishte normal, por gjykata e hodhi poshtë këtë version.