Drejtoria e Shëndetësisë në Komunën e Prishtinës në bashkëpunim me Trafikun Urban, kanë lëshuar në qarkullim një autobus të linjës 4, si pjesë e fushatës vetëdijësuese për kancerin e gjirit “Race for the Cure Prishtina 2024”, raporton Ekonomia Online.

Sipas organizatorëve, fushata e vitit të kaluar ka pasur një ndikim të madh në rritjen e numrit të mamografive të realizuara në kryeqytet.

Drejtori i Shëndetësisë për Komunën e Prishtinën Izet Sadiku, tha se dushata “Race for the Cure Prishtina 2024” do të përfshijë një sërë aktivitetesh, ndërsa apeloi tek gratë që të bëjnë sa më shumë mamografi.

“Sikur vitin e kaluar e kemi bërë një autobus të Trafikut Urban që është brenduar me moton e fushatës. Qëllimi ynë është që përmes kësaj fushate të sensibilizojmë sa më shumë gra për me bë mamografinë për arsye se ju e dini që kanceri i gjirit është njëra prej problemeve të kancerit tek femrat, dhe vazhdon të ketë rritje diku rreth 10-15 për qind. Ajo çka është e mirë në këtë të keqe është që po rritet mbi jetueshmëria e kancerit të gjirit dhe sot sipas statistikave mbi jetueshmëria është rritur 40 për qind më shumë se viteve të kaluara. Lufta kryesore është me zbuluar herët, andaj kjo është qëllimi i këtyre fushatave me zbuluar herët, dhe për këtë arsye në Prishtinë i kemi tre mamograf dhe po i ftojmë të gjitha gratë të bëjnë sa më shumë mamografi. Sepse bërja e mamografisë është e barabartë me shpëtim jete”, u shpreh Sadiku.

Ushtruesi i detyrës së kryeshefit të Trafikut Urban, Gazmend Vitia, tha se vazhdimisht kanë përkrahur iniciativa të tilla. Vitia tha se nga muaji tetor gratë që bëjnë mamografinë do ta kenë udhëtimin falas për një javë.

“Hera e fundit është herën e kaluar dhe besoj që do ta bëjë edhe këtë vit me rekomandimin e mjekut. Është shumë e rëndësishme dhe uroj që të gjitha vajzat dhe gratë ta shfrytëzojnë muajin tetor, si muajin e vetdijësimin dhe ndërgjegjësimin e tyre për kujdesin  e trupit dhe shëndetit. Këto janë shumë të rëndësishme janë iniciativa për vetëdijesim dhe mesazhe shumë të fuqishme për gratë dhe vajzat që të kenë parasysh që një kontroll e hershme shpëton një jetë. Të gjitha gratë të shkojnë dhe të kontrollohen ta parandalojnë, ose edhe ata që sfidohen të mbështesim dhe kanë një mesazh të fuqishëm nga ana të gjithë neve se e kanë mbështetjen tonë kontrolle të hershme mund të shpëtojë një herë, fuqia e brendshme e gruas është arma më e fortë që brenda saj, ato janë të fuqishme dhe të afta sa që përballojnë secilën sfidë”, u shpreh Vitia.

Fushata “Race for the Cure Prishtina 2024” do të përfshijë një sërë aktivitetesh, ndër të cilat më 6 tetor në Prishtinë do të organizohet ecja dhe vrapimi në mbështetje të grave që kanë kaluar përmes kësaj sëmundjeje.