Gjermania kritikon sulmin ajror izraelit ndaj një baze në Siri

Gjermania ka kritikuar sulmin ajror izraelit ndaj fushës ajrore Abu al-Duhur në veriperëndim të Sirisë, duke kërkuar respektimin e sovranitetit dhe integritetit territorial të këtij vendi.

Një zyrtar i lartë i Ministrisë së Punëve të Jashtme të Gjermanisë ka deklaruar për Anadolu se Berlini i ka ndjekur me shqetësim raportimet lidhur me sulmin.

“Çdo ndërhyrje ushtarake e huaj nuk kontribuon në stabilizimin e Sirisë apo në paqen në rajon”, ka deklaruar diplomati gjerman.

Ai ka theksuar se një Siri e qëndrueshme është e rëndësishme për stabilitetin e gjithë Lindjes së Mesme.

“Sovraniteti dhe integriteti territorial i Sirisë duhet të respektohen nga të gjitha vendet”, ka shtuar ai.

Gjermania gjatë muajve të fundit ka bërë thirrje për shmangien e përshkallëzimit të mëtejshëm dhe ka kërkuar që Izraeli të ndjekë rrugën diplomatike me Sirinë dhe aktorët e tjerë rajonalë për arritjen e marrëveshjeve të qëndrueshme të sigurisë.

Ndërkohë, kryeministri izraelit Benjamin Netanyahu ka pretenduar se Izraeli e kishte paralajmëruar Sirinë para sulmit që të mos lejonte prani turke në bazën ajrore.

Ministri i Jashtëm sirian, Asaad al-Shaibani, e ka kundërshtuar këtë arsyetim, duke thënë se Damasku e kishte informuar Izraelin se nuk kishte plane për krijimin e një baze turke apo prani të përhershme ushtarake në atë lokacion.

Edhe Ministria e Mbrojtjes e Turqisë ka bërë të ditur se asnjë delegacion ushtarak turk nuk ndodhej në bazë para ose gjatë sulmit, duke e cilësuar goditjen izraelite si shkelje të papranueshme të sovranitetit sirian.

Ankaraja ka përsëritur mbështetjen për rindërtimin e Sirisë dhe forcimin e kapaciteteve të saj, ndërsa zyrtarë turq kanë kritikuar ashpër politikat e Netanyahut dhe përshkallëzimin e fundit në rajon.