Presidenti amerikan Joe Biden, u ka bërë thirrje afganëve që të vendosin për të ardhmen e vendit të tyre, pas takimit që ka zhvilluar me presidentin afgan Ashraf Ghani dhe udhëheqësin e Këshillit të Lartë shtetëror për Pajtim Kombëtar, Abdullah Abdullah.

Biden i ka konsideruar liderët afganë “dy miq të vjetër”, teksa i ka pritur në Shtëpinë e Bardhë më 25 qershor dhe ka thënë se mbështetja amerikane për Afganistanin nuk merr fund, pavarësisht pse forcat ndërkombëtare janë duke u larguar pas gati dy dekadave luftë.

Duke folur nga Shtëpia e Bardhë, ulur afër Bidenit, Ghani ka thënë se respekton vendimin e presidentit amerikan për të tërhequr trupat amerikane.

Sipas tij, ky vendim e ka bërë secilin që të “rikalkulojë dhe rikonsiderojë situatën”.

Biden, në anën tjetër, ka thënë se “dhuna e pakuptimtë” që vazhdon të plagosë shtetin, duhet të ndalet, duke shtuar se Shtetet e Bashkuara do të bëjnë më të mirën “për të parë që autoritetet afganë kanë pajisjet që u duhen”.

Talibanët kanë fituar kontrollin e dhjetëra distrikteve nga forcat qeveritare në javët e fundit.

Zyrtarët afganë kanë thënë për Radion Evropa e Lirë se janë duke u zhvilluar luftime të aspra, pas nisjes së ofensivës nga forcat e sigurisë.

Ghani ka thënë se forcat afgane të sigurisë kanë rikthyer kontrollin e gjashtë distrikteve më 25 qershor.

Duke folur para gazetarëve, pas takimit me Bidenin, Ghani ka thënë se puna e Kabulit është që “të menaxhojë pasojat”.

Forcat e udhëhequra nga Shtetet e Bashkuara kanë rrëzuar talibanët nga pushteti në tetor të vitit 2001.

Talibanët kanë qenë duke strehuar atëbotë Osama Bin Laden dhe figura tjera të Al-Kaidës, të lidhura me sulmet e 11 shtatorit të po atij viti në Shtetet e Bashkaura.

Presidenti amerikan Joe Biden ka thënë se tërheqja amerikane tani është e arsyeshme, pasi forcat amerikane janë siguruar që Afganistani nuk do të bëhet më bazë për xhihadistë të huaj që të kryejnë komplote kundër Perëndimit.