Janë grumbulluar më shumë se dhjetë mijë dollarë në fondin e hapur në platformën “GoFundMe” për të paguar gjobën e yjeve shqiptarë të Zvicrës, për festimin e tyre me shqiponjë.

Granit Xhaka, Xherdan Shaqiri dhe Stephan Lichsteiner u dënuan bashkë me 25 mijë franga pasi festuan me shqiponjë në fitoren 2 me 1 në Botëror ndaj Serbisë, transmeton Koha.net.

Mbrëmë u hap faqja për grumbullimin e të hollave për të paguar këtë shifër, ndërsa për pak orë janë mbledhur më shumë se 10 mijë dollarë.

Në përshkrim të fondit të hapur thuhet se “tre lojtarët kanë sjellë gëzim e lumturi te zviceranët dhe shqiptarët në gjithë botën andaj kërkohet të përkrahen”.

Po ashtu është cekur se nëse Federata e Zvicrës nuk pranon paratë, ato do të dorëzohen bamirësi.