Ambasadori britanik në Kosovë, Jonathan Hargreaves, ka vizituar sot ministrin në detyrë të Mbrojtjes, Ejup Maqedonci.

Gjatë takimit, Hargreaves dhe Maqedonci folën për zhvillimet e fundit të sigurisë dhe forcimin e bashkëpunimit ndërmjet dy shteteve.

“Gjatë takimit, biseduam për situatën aktuale të sigurisë në rajon dhe më gjerë, rëndësinë e koordinimit të ngushtë me partnerët strategjikë, si dhe për avancimin e bashkëpunimit ndërmjet Republikës së Kosovës dhe Mbretërisë së Bashkuar në fusha me interes të përbashkët” u shpreh Maqedonci.

Ky është njoftimi i plotë i tij:

Ishte kënaqësi që sot të pres në takim Ambasadorin e Mbretërisë së Bashkuar në Republikën e Kosovës, Jonathan Hargreaves, me të cilin zhvilluam një diskutim të frytshëm mbi zhvillimet aktuale të sigurisë dhe forcimin e bashkëpunimit dypalësh në fushën e mbrojtjes.

Gjatë takimit, biseduam për situatën aktuale të sigurisë në rajon dhe më gjerë, rëndësinë e koordinimit të ngushtë me partnerët strategjikë, si dhe për avancimin e bashkëpunimit ndërmjet Republikës së Kosovës dhe Mbretërisë së Bashkuar në fusha me interes të përbashkët.

Shpreha mirënjohjen për mbështetjen e vazhdueshme që Mbretëria e Bashkuar i ka dhënë Republikës së Kosovës dhe sektorit tonë të mbrojtjes, duke vlerësuar partneritetin e ngushtë që kemi ndërtuar ndër vite.

Rikonfirmuam angazhimin e përbashkët për ta thelluar bashkëpunimin në dobi të paqes, sigurisë dhe stabilitetit rajonal, si dhe për të vazhduar koordinimin e ngushtë për sfidat e përbashkëta të sigurisë.