Spiunazhi shfaqet te Milani. Sipas të përditshmeve italiane “La Repubblica” dhe “Il Sole 24 Ore”, ish-administratori i deleguar i kuqezinjve, Marco Fassone, gjatë periudhës që ishte në këtë detyrë u vu në kërkim të një spiuni, e për këtë arsye nisi ndjekjen e 4 gazetarëve.

Bëhet fjalë për Enrico Curro e Luca Pagni të “La Repubblica”-s, Carlo Festa të “il Sole 24 Ore”, si dhe Tobia Di Stefano të “Libero”-s.

Gjithçka ndodhi vitin e kaluar, më konkretisht në periudhën 19 shkurt-2 mars, dhe është dokumentuar në dosjen e Milanit që iu prezantua Gjykatës së Milanos, në çështjen e ngritur mes klubit dhe Fassones, me këtë të fundit që ngriti padi kundër kuqezinjve.

Mësohet se Fassone i ishte drejtuar agjencisë investigative “Carpinvest” për të bërë mbrojtjen e markës së Milanit, ndjekjen e gazetarëve, si dhe kontrollin e telefonave “smart” dhe tabletëve të punonjësve të klubit. Për këta të fundit u bë kërkesë edhe te “Telecom”. Mësohet gjithashtu se, Fassone ka shpenzuar 74 mijë euro për të gjithë këtë.