Ministri i Financave Avdullah Hoti gjatë vizitës zyrtare që po zhvillon në Mal të Zi, është pritur në takim nga ministri i Financave të Malit të Zi, Darko Radunovič si dhe zyrtarë tjerë të lartë të këtij shteti.

Ministri Hoti në takim me zyrtarët qeveritar të Malit të Zi ka paraqitur propozimin e Qeverisë së Kosovës për organizimin dhe mbajtjen e mbledhjes së përbashkët të dy Qeverive, ku me këtë rast do të nënshkruheshin shumë marrëveshje të fushën e ekonomisë.

Gjatë këtij takimi u diskutua për situatën e përgjithshme makrofinanciare, Inicimin e Marrëveshjes së Eliminimit të Tatimit të Dyfishtë, bashkëpunimin për përmirësimin e kushteve të të bërit biznes ndërmjet dy vendeve, përmirësimin e proceduarve fiskale dhe doganore, bashkëpunimin në fushën e shkëmbimit të informacionit në përputhje me kuadrin ligjor të secilit vend, përafrimin dhe harmonizimin e ngarkesave doganore për mallrat që paguajnë akcizë, sidomos duhanit dhe kafesë si dhe për unifikim të dokumentacionit për import – eksport.

Ministri Avdullah Hoti falënderoi Ministrin Radunovič për pritjen dhe gatishmërinë e tij dhe të shtetit të Malit të Zi për rritjen e bashkëpunimit ndërshtetëror si dhe për unifikimin e marrëveshjeve të cilat e shtojnë bashkëpunimin dhe zhvillimin ekonomik në dy vendet.

Me këtë rast Ministri Hoti e njoftoi homologun e tij për proceset buxhetore dhe financiare nëpër të cilat po kalon Kosova.

Ndërsa, ministri i Financave të Malit të Zi Darko Radunovič falënderoi Ministrin Hoti për vizitën dhe për përkushtimin e tij në rritjen e bashkëpunimit ekonomik dhe financiar ndërmjet dy Ministrive, si dhe shfaqi gatishmërinë e tij dhe të shtetit të tij për forcimin e bashkëpunimit ekonomik me Kosovën.

Gjatë vizitës së tij Ministri Hoti u takua edhe me Nënkryetarin e Parlamentit të Malit të Zi, Genc Nimanbegu, si dhe me Ministrin për të drejtat e njeriut dhe pakicave, Mehmed Zenka, ku diskutuan për rritjen e bashkëpunimit ndërmjet Kosovës dhe Malit të Zi.