Prishtinë, 16 Prill 2025 – Srulik Ajnhorn, një emër i njohur në marketingun politik izraelit dhe ish-këshilltar i kryeministrit Benjamin Netanyahu, është duke udhëhequr një fushatë të sofistikuar propagandistike në shërbim të presidentit serb Aleksandar Vuçiq, ndërkohë që përballet me akuza serioze në vendin e tij.

Sipas një hulumtimi të përbashkët të BIRN dhe gazetës izraelite Haaretz, Ajnhorn ndodhet në Beograd ku ka themeluar firmë konsulence dhe ka ndihmuar në krijimin e një narrative ndërkombëtare që paraqet Vuçiqin si paqebërës global, yll i podkasteve dhe udhëheqës modern pro-perëndimor.

Kjo fushatë përfshinte pjesëmarrje në media ndërkombëtare, reklama në platforma si Taboola dhe Outbrain, si dhe afishe në kryeqytete perëndimore që promovonin “erën e Vuçiqit”. Strategjia u zbulua aksidentalisht gjatë hetimeve për aferën “Katargate”, e cila përfshinte pagesa të dyshimta nga Katari për promovim të pozitës së tij në mediat izraelite.

Ajnhorn është gjithashtu i dyshuar për rrjedhje të dokumenteve ushtarake sekrete dhe për frikësim të dëshmitarëve në një çështje korrupsioni që përfshin Netanyahun. Ai nuk i është përgjigjur autoriteteve izraelite dhe aktualisht vepron i lirë në Serbi dhe rajon, me lidhje të fuqishme në qeverinë e Vuçiqit dhe atë të Malit të Zi.

Në raport përmendet edhe roli i tij në ndërmjetësimin e eksporteve serbe të armëve drejt Izraelit – një rritje dramatike nga 1.4 milionë euro në vitin 2023 në 42.3 milionë euro në vitin 2024 – në kulmin e akuzave për krime lufte të ushtrisë izraelite në Gaza.

Ndërkohë, adresa e kompanisë së tij në Beograd përputhet me atë të Institutit për Politikë dhe Ekonomi të Evropës Juglindore (IPESE), ku Ajnhorn shërben si anëtar bordi së bashku me figura të tjera të afërta me qeverinë serbe.