Institucionet e Bashkimit Evropian kanë konfirmuar se BE nuk ka ndonjë datë të caktuar se deri kur Kosova duhet ta ratifikojë Demarkacionin e Kufirit me Malin e Zi, në mënyrë që të marr liberalizimin e vizave.

Gjithashtu, kanë sqaruar se janë të pasakta deklaratat, sipas të cilave nëse këtë vit nuk hiqen vizat për kosovarët, atëherë Kosova mund të mbetet edhe një kohë të gjatë pa viza.

Për dy pyetjet e dërguar nga lajmi.net, Zyra e Raportueses për Kosovën në Parlamentin Evropian, Ulrike Lunacek ka kërkuar përgjigje edhe nga Drejtoria e Përgjithshme e Fqinjësisë, Zgjerimit dhe Negociatave.

“Zyra jonë në Bruksel ka pyetur Drejtorinë e Përgjithshme të Fqinjësisë, Zgjerimit dhe Negociatave për pyetjet që keni dërguar dhe përgjigja në të dyja pyetjet është: Jo”, thuhet në përgjigjen e Zyrës së Lunacek për lajmi.net

Përndryshe, ratifikimi i Marrëveshjes së Demarkacionit të Kufirit me Malin e Zi është vendosur si kusht për liberalizimin e vizave në vitin 2012 në kuadër të Udhërrëfyesit për liberalizim.

Por, marrëveshja e nënshkruar më 26 gusht 2015 në Vjenë nuk është ratifikuar ende, pasi opozita dhe disa deputetë të koalicionit qeverisës janë kundër kësaj marrëveshjeje, duke thënë se me këtë marrëveshje Kosova i humbë mbi 8 mijë hektarë tokë.

Kështu koalicioni nuk po arrin t’i sigurojë 80 votat e nevojshme për ratifikimin e Demarkacionit, i cili ka mbetur kushti i fundit për liberalizimin e vizave.