Anëtari i Kryesisë i Lëvizjes Vetëvendosje, Glauk Konjufca ka hedhur dyshime në qëllimin e vendimit të Gjykatës Kushtetuese.

Konjufca në “Debat Plus” thotë se vendimi erdhi pasi u pa se nuk po mundet të zgjedhet presidenti.

“Më është dukur se vendimi i Gjykatës Kushtetuese ka ardhur si epilog i pamundësisë të forcave politike për të zgjidhur krizën e presidentit. Kështu mund të konstatohet nga një vështrim i jashtëm i rrjedhës së ngjarjeve politike”, tha ai, përcjell Telegrafi.

Anëtari i Kryesisë i Lëvizjes Vetëvendosje thotë se vendimi ishte i drejt dhe i qëlluar dhe sipas tij as Vetëvendosjes nuk i kanë dhënë të drejt.

“Vendimi është më i thellë. Unë nuk mendoj se i ka dhënë të drejt Vetëvendosjes ky vendim. Vendimi vetëm se e ka pasur të drejtën e vendimmarrjes te populli. Proceduralisht i ka dhënë të drejt LVV-së, por në thelb të drejtë ky vendim i ka dhënë qytetarit”.

Konjufca e konsideron të vonuar vendimin e kushtetueses pasi sipas tij mandati i Etem Arifit është përcaktuar qysh në muajin maj.

“Mund të themi se Gjykata Kushtetuese po i përshtatet dinamikave politike në vendin tonë. Kjo nuk është gjë e mirë nëse e shohim në këtë kënd”, tha ndër të tjera Glauk Konjufca.