Partia Konservatore e kryeministres britanike, Theresa May, fitoi 314 ulëse në Parlament, tregojnë exit poll-et e para të zgjedhjeve të së enjtes.

Sipas tyre, Laburistët kanë dalë të dytët, me 266 ulëse.

Gjithnjë sipas exit poll-eve, Konservatorët vështirë se do të sigurojnë shumicën absolute në Parlamentin 650-vendesh, për të qeverisur të vetëm.

Partia Kombëtare Skoceze ka siguruar 34 mandate, ndërsa Liberal-Demokratët 14.

Theresa May, nëse nuk arrin të formojë e vetme qeverinë, do të duhet të bëjë koalicion ose të qeverisë me mbështetjen e disa prej partive më të vogla.

Kjo, sipas vlerësimeve të agjencisë Reuters, mund të shkaktojë trazira në skenën e brendshme politike dhe të shtyjë negociatat për daljen e Britanisë nga Bashkimi Evropian, të cilat duhet të nisin më 19 qershor.

May i ka thirrur zgjedhjet e parakohshme në fillim të prillit, me qëllim forcimin e pozicionit të saj në negociatat për Brexit.

Këto negociata do të ndikojnë punësimin në Britani, pagat, çmimet e banesave, normat e interesit, migrimin, nivelin e tregtisë, mbrojtjen dhe sigurinë, financat publike dhe shërbimet pubike.

May, gjatë fushatës zgjedhore, ka thënë se opozita do që të pengojë vullnetin e popullit britanik për dalje nga BE-ja.

Laburistët opozitarë, me në krye Jeremy Corbyn, ndonëse me ton më të butë ndaj BE-së, kanë thënë se nuk do të tërhiqen nga procesi i Brexit-it nëse i fitojnë zgjedhjet e 8 qershorit.

Dy partitë tjera kryesore në këto zgjedhje – Partia Kombëtare Skoceze e udhëhequr nga Ministrja e Parë e Skocisë, Nicola Sturgeon, dhe Partia Liberal-Demokrate e udhëhequr nga Tim Farron, i kanë kundërshtuar planet për daljen e Britanisë nga BE-ja dhe nga tregu i përbashkët evropian.

Një tjetër çështje që ka dominuar fushatën zgjedhore, ka qenë siguria kombëtare.

Britania është goditur nga tre sulme terroriste në muajt e kaluar.

Më i fundit ka ndodhur më 3 qershor në Londër, ku militantët islamikë kanë vrarë shtatë persona dhe kanë plagosur 48 të tjerë.

Theresa May është parë si lidere më e besueshme në luftën kundër terrorizmit, pasi, në të njëjtën kohë, dëshiron të ruajë marrëdhënie të mira me aleatët e NATO-s.

Rezultatet finale të zgjedhjeve të 8 qershorit priten të premten, në kohën e drekës.