Ministrja e Integrimit Evropian, Dhurata Hoxha njoftoi se është lajm i mirë për Kosovën që aplikimi ynë për grante në vlerë mbi 6 milionë euro u miratua nga WBIF duke e bërë Kosovën njërën nga vendet përfituese të Ballkanit Perëndimor.

Ministrja Hoxha theksoi rëndësinë e WBIF granteve në implementimin e projekteve që kanë për synim zhvillimin e qëndrueshëm të sektorëve strategjik siç është energjia, transporti, mjedisi, si dhe zhvillimi i sektorit social dhe privat.

Më tej, Ministrja Hoxha shtoi se “Ministria e Integrimit Evropian, në konsultim me bankat zhvillimore të cilat marrin pjesë përmes huadhënies, koordinoi procesin e përgatitjes së aplikimit të Qeverisë së Republikës së Kosovës në kuadër të thirrjes së 21-të për grante të asistencës teknike të Kornizës Investuese për Ballkanin Perëndimor (WBIF)”. Ajo informoi se Komiteti Drejtues i WBIF ka njoftuar se janë miratuar aplikacionet për grante në mbledhjen e 20-të të datës 25-26 qershor 2019, në Berlin.

Ministrja Hoxha deklaroi se në kuadër të asistencës teknike për Kosovën u miratuan 4 grante në nivel nacional në shumë prej mbi 5.5 milionë euro, dhe një projekt në nivel rajonal në shumë 624,000 euro. Kosova përfiton nga këto grante përmes këtyre projekteve:

• “Sistemet e Ngrohjes Qëndrore (€2,010,000)”

• “Plani për Furnizimin me Gaz dhe Shqyrtimi i Kornizës Rregullative dhe Asistencës (€1,507,500)”

• “Nxitja dhe Shfrytëzimi i Mundësive për Sigurinë e Ujit në Kosovë: Ndërtimi i Digës së Kremenatës (€1,040,000)”

• “Ndërtimi dhe Rehabilitimi i Infrastrukturës së Kujdesit Shëndetësor (€1,005,000)”

• “REEP Plus, Dritarja 4 – Ndërtesat Publike (€624,000)”.

Ministria e Integrimit Evropian dhe Ministrja Hoxha si koordinatore kombëtare e fondeve IPA, do të vazhdojë të koordinojë asistencën zhvillimore në Kosovë me qellim të implementimit të reformave që e sjellin vendin më afër Bashkimit Evropian.