Nesër pritet të vendoset në Komisionin Qendror të Zgjedhjeve në Shqipëri mbi fatin e dy deputetëve Aqif Rakipi të PDIU-së dhe Gledion Rehovicës së LSI-së.

Prokuroria e Përgjithshme ka kërkuar ndërprerjen e mandatit për deputetin e PDIU-së dhe atë të LSI-së, pasi sipas organit të akuzës ligjvënësit në fjalë janë subjekt i ligjit të dekriminalizimit.

Dy deputetëve ju janë marrë shenjat e gishtave në shkurt dhe i janë dhënë Interpolit. Në datën 22 dhjetor Interpol Roma solli të dhëna për dy deputetët.

Për deputetin e PDIU-së, Aqif Rakipi, Interpol Roma thotë se është proceduar për vjedhje me emrin Skënder Ejylbegaj. Vjedhja në fjalë ka ndodhur në 03.11.1998, kohë kur deputeti ka deklaruar në formularin e dekriminalizimit se ka qenë emigrant në Itali, raporton Shekulli.

Deputeti i LSI-së, Gledion Rehovica sipas Interpol Romës, është proceduar për vjedhje dyqani me emrin Kusta Mina në 27.02.1999, kohë kur vetë deputeti ka deklaruar se jetonte në Itali si student.