Është duke vazhduar intervistimi i disa personave në Gjilan në lidhje me manipulimin e rezultatit të zgjedhjeve të parakohshme që u mbajtën më 28 dhjetor të 2025-ës, raporton Ekonomia Online.

Ndonëse raportohet për intervistimin e të paktën 65 komisionerë nga komuna e Vitisë, megjithatë, zëdhënësi i policisë për rajonin e Gjilanit, Ismet Hashani për Ekonomia Online është rezervuar të japë numër.

 “Jemi në proces të intervistimit në kordinim me prokurorin e shtetit të personave të dyshimtë të qendrës komunale të votimit në Viti, lidhur me veprën penale ‘Falsifikim i rezultateve të votimit’. Për ecurinë e hetimit të këtyre rasteve do të ju njoftojmë me kohë“, tha Hashani.

Prokuroria Themelore në Gjilan ka dalë me njoftim për aksionin lidhur me dyshimet për manipulim të votave, që u zhvillua sot në këtë rajon.

Komuna ku ka pasur më tepër ndryshim në rezultat doli të jetë Vitia, prandaj komisionerët e dyshuar po merren në pyetje akoma.

“Me datë 03.02.2026 kemi autorizuar policinë për intervistimin e të dyshuarve, fillimisht në Komunën e Vitisë, me që në këtë komunë ka pasur më tepër ndryshim në rezultat sipas rinumërimit, në krahasim me komunën e Gjilanit, Kamenicës, Novobërdës, Ranillugut, Parteshit, për të cilat intervistimet  e të dyshuarve janë duke vazhduar akoma.” 

Sipas Prokurorisë, në rastin e Gjilanit, dallimi s’ka qenë shumë i madh, prandaj procesi për personat që janë objekt hetimi, do të vijojë në procedurë të rregullt.

“Ju njoftojmë se në territorin, kompetencë e së cilës është Prokuroria Themelore në Gjilan, nuk është ndonjë dallim i theksuar nga rezultati i publikuar më parë në krahasim me rezultatin pas rinumërimit të votave (vlen të theksohet se vetëm një kandidat rezulton  me -145 vota pas rinumërimit dhe të gjithë të tjerët janë nën këtë shifër) siç ka rezultuar në  komunat e tjera të Republikës së Kosovës, andaj Prokuroria Themelore në Gjilan do të vazhdojë me hetime në procedurë të rregullt, deri në intervistimin e të gjithë të dyshuarve në gjitha komunat, përveq nëse paraqitet ndonjë rrethanë tjetër.”