Ministri Ismaili: Sëmundjet e rralla janë përfshirë në Listën e Barnave Esenciale

Prishtinë | 26 Qer 2019 | 11:51 | Nga Ekonomia Online Shkarko Videon HD

Për ta shkarkuar videon ju lutem kyçuni ose regjistroni një llogari të re!

| Regjistrohu

Ministri i Shëndetësisë, Uran Ismaili, ka raportuar në Komisionin për Shëndetësi mbi procesin e revidimit të listës esenciale të barnave, përfshirja e barnave për sëmundjet e rralla, vonesat në procedimin e projektligjeve, funksionalizimin e Sistemit të Informimit Shëndetësor dhe furnizimin e ShSKUK-së me infuzione, raporton Ekonomia Online.

Ismaili, ka treguar se tashmë ka përfunduar e gjithë puna për Revidimin e Listës së Barnave Esenciale.

Ministri Ismaili ka treguar se lista komplementare do të pasurohet me një numër më të madh të barnave për sëmundjet e rralla që përbëjnë një barrë të madhe financiare për pacientët.

“Komiteti Teknik për revidimin e Listës së Barnave Esenciale ka përfshirë në listên e saj komplementare edhe barnat për sëmundjet e rralla në mënyrë që në të ardhmen numri i pacientëve që mbulohen me terapi nga MSh të rritet”, ka thënë ai.

Lista e Barnave Esenciale të cilën e sigurojnë Institucionet Publike për qytetarët ka qenë e pareviduar nga viti 2012.

“Të gjitha barnat kanë një kosto dhe nëse fusim barna që nuk duhet, shpenzojmë para kot. Kemi kaluar në një format ndërkombëtar të listës esenciale. Kemi arrit që produktet që i paraqesim në listë të mos i përngjajmë dy kompanive për ta rritur konkurrencën. Kemi eliminuar produkte që nuk janë përdorë. Kemi sjellë risi në bazë të kërkesave të reja, në bazë të pacientëve dhe klinikave që të ketë përfshirje më të madhe të njerëzve që kërkojnë trajtim. Kjo do sjellë trajtime të reja, por do ulë edhe koston për pacientët tanë”.

Duke e kuptuar peshën e sëmundjes për pacientin, familjen, rrethin dhe sistemin shëndetësor, Ministria e Shëndetësisë në vitin 2018 ka ngritur Grupin e punës për hartimin e Koncept Dokumentit për Sëmundjet e rralla, duke synuar gjetjen e rrugës më të mirë dhe më pragmatike për të adresuar nevojat e këtij grupi të ndjeshëm të popullatës.

Koncept Dokumenti është hartuar dhe ka dalur në debat publik dhe brenda pak ditësh do të dërgohet në Qeveri për miratim.

Pas aprovimit të Koncept Dokumentit nga Qeveria, Ministria e Shëndetësisë do të vazhdojë menjëherë me Grupin e punës për hartimin e Planit të veprimit për institucionalizimin e përkujdesjes shëndetësore të pacientëve me sëmundje të rralla.

Të ngjashme