Komandanti i misionit të KFOR-it të udhëhequr nga NATO, gjeneralmajori Ferenc Kajari, priti sot presidenten e Komitetit Paralimpik të Kosovës (KPK), Njomza Emini dhe zëvendëspresidentin Daut Tishuki në Shtabin e KFOR-it (Camp Film City) për urime lidhur me anëtarësimin e KPK-së në Komitetin Paralimpik Ndërkombëtar dhe për të diskutuar se rreth zhvillimit të mëtutjeshëm të përkrahjes së vazhdueshme të KFOR-it për sportistët me aftësi të kufizuara dhe në veçanti KPK-në.
KFOR-i e ka mbështetur KPK-në në tetë vitet e fundit dhe ka dhënë kontribut të rëndësishëm në organizimin e Lojërave Para Sportive Kosova 2022 në Akademinë Kombëtare të Sigurisë në Vushtrri.
Presidentja Emini e falënderoi gjeneralin për mbështetjen e vazhdueshme të KFOR-it për lëvizjen paralimpike në Kosovë ndër vite dhe e njoftoi atë për anëtarësimin e KPK-së në Komitetin Paralimpik Ndërkombëtar (KPN).
“Ju keni qenë këtu për ne për shumë vite, si në kohë të vështira, kur ishim ende organizatë shumë e vogël, ashtu edhe tani që lëvizja Paralimpike ka bërë përparim të dukshëm. Dua t’ju falënderoj me gjithë zemër për mbështetjen e palëkundur të KFOR-it për gati një dekadë”.
Gjenerali shprehu interesimin për të zhvilluar edhe më tutje mbështetjen e KFOR-it për KPK-në, për shembull duke dhënë mbështetje me pajisjen dhe trajnimin e sportistëve paraolimpikë të Kosovës në përgatitje për Lojërat Paralimpike 2024 në Paris.
Në takimin mes KPK-së dhe KFOR-it ka marrë pjesë edhe nënpresidenti i KPK-së, Daut Tishuki.
Si përgjigje ndaj një kërkese zyrtare nga KPK-ja, KFOR-i kohët e fundit vendosi të përkthejë dhe shtypë shumë nga publikimet e tij në alfabetin Braille, në mënyrë që më shumë informacion rreth aktiviteteve të KFOR-it të jetë në dispozicion për të gjitha komunitetet dhe qytetarët në Kosovë, duke përfshirë personat e verbër.