Lëvizja FOL ka organizuar për herë të nëntë ceremoninë e ndarjes së Çmimit për Guxim Qytetar për vitin 2018.
Nderi i këtij çmimi këtë vit iu dha Vasfije Krasniqit, e mbijetuar e dhunës seksuale gjatë luftës në Kosovë e cila pak kohë më parë kishtë rrefyer publikisht përjetimet e saj, raporton Ekonomia Online.
Mexhide Demolli, drejtoreshë ekzekutive e Lëvizjes Fol, tha se Vasfije Krasniqi -Goodman përfaqëson shembullin më të mirë të njeriut guximtar.
“Vasfije Krasniqi – Goodman ishte viktimë e dhunës seksuale gjatë luftës në Kosovë e cila rrëfeu para publikut kosovar dhe më gjerë tmerret dhe torturat e përjetuara gjatë luftës por edhe procesin tutje nëpër Gjykata”.
“Ajo, me rrëfimin e saj zgjodhi të mos jetë indiferente, së pari ndaj vetes dhe ndaj të gjithë atyre vajzave dhe grave, djemve dhe burrave, viktima të dhunës seksuale gjatë luftës”, tha Demolli.
Ndërsa anëtarja e Lëvizjes, Leonora Kryeziu, tha se Vasfije Krasniqi zgjodhi të jetë e guximshme për veten dhe për të gjitha viktimat e dhunës seksuale.
“Ajo zgjodhi të jetë e guximshme për veten dhe për të gjitha viktimat e dhunës seksuale, ku me rrëfimin e saj përçoi guxim, dinjitet. Përkundër të gjitha përpjekjeve të saj ajo vendosi që përjetimin e saj të dalë dhe ta rrëfejë publikisht.”
E në pamundësi për të qenë prezente në ndarjen e cmimit, Vasfije Krasniqi – Goodman përmes një lidhjeje direkte nga shtëpia e saj në Amerikë tha se ndihet e obliguar që t’u ndihmojë të gjitha viktimave të luftës të flasin për atë se çfarë ju ka ndodhur.
“Faleminderit në emër të të gjithëve. Me këto dekorata ndihem e obliguar t’iu ndihmoj të gjitha viktimave të flasin për çfarë ju ka ndodhur”, tha Krasniqi-Goodman.