Në një takim me banorët e rajonit të Dushkajës, kandidati i Nismës për kryetar të Gjakovës, Fazli Hoxha, ka premtuar ndryshime aq të mëdha sa do t’ia ndërrojë edhe epitetin qytetit.

Mes tjerash, ai ka thënë se do të mbillen shumë drurë e gjelbërim që Gjakova të mos quhet më e Kuqe, por Gjakova e Gjelbëruar.

Një tjetër premtim “i fortë“ i Hoxhës në tubimin ku merrte pjesë dhe kryetari i Nismës, Fatmir Limaj, ishte për ndërmarrjet e privatizuara.

“Zhvillimi ekonomik do ndodhe duke i kthyer pronat që janë privatizuar të kthehen ne pronësi të komunës së Gjakovës”, tha kandidati i Nismës.

Më tutje, Hoxha ka shpalosur programin e tij për qeverisjen e Gjakovës.

“Kemi planifikuar të përfundojmë infrastrukturën rrugore e cila rreth 30% është pa u kry; do të bëhet digjitalizimi i sistemit të shëndetësisë; do ta bëjmë funksional trekëndëshin mësimdhënës-prind-nxënës; do të krijohen klube futbolli ne komunën e Gjakovës; do të mbjellim drurë të ndryshëm që të mos quhet më Gjakova e Kuqe, por Gjakova e Gjelbëruar”.

Ai ka premtuar dhe hapjen e qendrave të kulturës, ndërtimin e 4 çerdheve në qytet dhe 4 tjera në fshatra, si dhe zhvillimin e turizmit.

Dukagjini i thotë “PO” konceptit socialdemokrat të Nismës

Ndërsa, lideri i Nismës, Fatmir Limaj, ka rikujtuar se projekti i parë që e kishte nënshkruar si ministër i Transportit ka qenë për Gjakovën, pikërisht për ndërtimin e rrugës së Dushkajës.

Limaj ka lavdëruar kandidatin e tyre, si një njeri që fillimisht ishte rreshtuar me ata që e sollën lirinë në Kosovë.

“Ky njeri është i gatshëm t’i shërbejë vendit të vet, ka çka i jep Gjakovës dhe Kosovës, dhe si rezultat i kësaj sot e kemi kandidat për komunën e Gjakovës”, u shpreh ai.

“Ne nuk premtojmë, ne zotohemi, ne dimë cilat janë detyrat tona… Por vetëm Nisma nuk mund ta bëjë këtë”, tha Limaj, duke kërkuar votën për partinë që ai drejton në zgjedhjet e 22 tetorit.

Sipas tij, koncepti socialdemokrat po përkrahet në secilin qytet të Kosovës. “Filozofia jonë politike i duhet më së shumti vendit tonë. Ne nuk kemi kohë për të humbur duke i helmuar djemtë dhe vajzat e reja. Në vend të kësaj ne jemi orientuar të jemi zëri i njerëzve të varfër, i pensionerit, zëri i punëtorit që i bëhet padrejtësi, të jemi zëri i fermerëve e ndërmarrësve”, u shpreh Limaj.