Instituti Hidrometeorologjik i Kosovës përmes një njoftimi në faqen zyrtare kishte paralajmëruar se përgjatë datës 22 korrik priteshin zhvillime të fuqishme konektive, të cilat do të rezultonin me stuhi lokale, bubullima, reshje shiu, breshër e stuhi.

Për këtë arsye ishte njoftuar për “nivelin portokalli” të rrezikut, duke thënë se ka rrezik për rruge, dëmtime të rrjetit energjetik, pengesa në sistemin e telekomunikimit, përmbytje të shpejta loakale, dëmtime të objekteve, automjeteve e kulturave bujqësore.

Megjithatë përgjatë 22 korrikut nuk ka pasur një manifestim të tillë të motit, siç ka paralajmëruar IHMK-ja.

Por pse ka ndodhur kjo?

Meteorologu Mendim Rugova ka thënë se për shkak të situatës meterologjike të datës 21 korrik, është pritur edhe vazhdimësi e saj përgjatë datës 22, megjithatë sqaron se Kosova s’është përfshirë në momentet e fundit.

“Ka qenë pak e parashikueshme që mund të zgjaste edhe pas mesnate ndonjë stuhi. Ka pasur në Adriatik, por momentin e fundit s’ka hyrë në vendin tonë, siç parashihej. Prandaj dita e sotme s’pati potencial për stuhi”, ka thënë Rugova në Klan Kosova.

“Mund të ndodh në parashikime, që brenda 24-orëve mund të ketë ndryshim drastik”, ka thënë ai në emisionin e mbrëmjes në Klan Kosova më 22 korrik.