Ka nisur punimet në Daka, kryeqytetin e Bangladeshit, Konferenca e 45-të e ministrave të jashtëm të vendeve të Organizatës së Bashkëpunimit Islamik, organizata e dytë më e madhe ndër-qeveritare pas OKB-së, që grupon 57 shtete anëtare.

Në Konferencë merr pjesë si e ftuar speciale edhe Kosova, me një delegacion kryesuar nga numri dy i qeverisë dhe Ministri i Jashtëm, Behgjet Pacolli. 57 shtetet anëtare përfaqësohen nga dhjetra Ministra të Jashtëm, Zëvendëskryeministra dhe Diplomatë të nivelit të lartë së bashku me një numër të madh përfaqësuesish nga shtete vëzhgues.

Tre janë objektivat e pjesëmarrjes e shefit të diplomacisë kosovare dhe delegacionit, që ai kryeson e që e nisi aktivitetin e vet në margjina të konferencës me takime të shumta dypalëshe: lobimi për njohjen e mëtejshme të Kosovës,  anëtarësimi në Interpol dhe aplikimi për statusin e vendit vëzhgues në OBI e që synojnë të avansojnë integrimin ndërkombëtar të Kosovës.

Për këto objektiva, ministi Pacolli u takua me homologët e tij nga Bangladeshi, Arabia Saudite, Azerbaixhani, Kazakistani, Guajana, Ishujt Komore, Palestina, Surinami, Maldivet, Mozambiku, etj.

Konferenca e sivjetme shënon kalimin e drejtimit të radhës së kësaj organizate nga Bregu i Fildishtë tek Bangladeshi. Tema kryesore e saj është “vlerat islamike për paqe të qëndrueshme, solidariteti dhe zhvillimi”,  me fokus të veçantë tek drama e refugjatëve Rohinga, që janë spastruar etnikisht prej territorit të Myanmarit, duke u shpërndarë në vende fqinjë.

Punimet e seancës së parë  u përshëndetën nga Kryeministrja e Republikës Popullore të Bangladeshit, Sheikh Hasina. Për të treguar rëndësinë, që i jep marrëdhënieve me këtë pjesë të botës dhe qasjen bashkëpunuese me të, në Konferencë merr pjesë edhe Ministrja e Jashtme e Kanadasë, zonja Christia Freeland, e cila ju drejtua me një fjalim të vlerësuar, këtij forumi ndërkombëtar.

Ministri i jashtëm Pacolli pati një takim të shkurtër edhe me Ministren e Jashtme të Kanadasë, Kristia Freeland.