Ka filluar të mbahet panairi i përvitshëm ndërkombëtar “Prishtina 2017”, në të cilin po marrin pjesë 150 ndërmarrje nga Evropa.

Kryetari i Odës Ekonomike, Safet Gërxhaliu, tha se ky panair e dëshmon fuqinë e ekonomisë, duke shtuar se kompanitë pjesëmarrëse do të ndikojnë në përmirësimin e imazhit të Kosovës, raporton Ekonomia Online.

“Ky panair sa ka rëndësi ekonomike, ka edhe rëndësi promovuese. Ky panair dëshmon se për ekonomi duhet të bëhet më shumë se sa të flitet. Dua të besoj që së shpejti do ta kemi ligjin për tregti të brendshme dhe ligjin antidamping.

Nga ky panair, Gërxhaliu apeloi tek qarqet politike që të lënë anash inatet dhe përfitimet e grupeve dhe le të bëhet më tepër që ky popull ta shijojë liberalizimin.

Kryetarja e Unionit të Dhomave Ekonomike të Shqipërisë, Ines Muçostepa, tha se të dy shtetet duhet të punojnë më shumë që të ketë më shumë kompani prezente në këso panairesh.

“Ne si dy shtete kemi një treg të përbashkët ekonomik për të cilin ne do të duhet të punojmë dhe do të doja që prezente të ishin shumë kompani nga Shqipëria”, tha ajo.

Në këtë ngjarje ishte i pranishëm edhe kryetari i Mitrovicës Agim Bahtiri, i cili kërkoi nga institucionet vendore që të bëjnë më shumë për bizneset, në mënyrë që të krijohen vende të reja pune.

“Ka ardhur koha që të përkrahen njerëzit e bizneset sepse pas një lufte vetëm ata ndërtojnë shtetin, i ftoj institucionet e Kosovës që të përkrahen  njerëzit e bizneset sepse vetëm ata krijojnë vendet e punës dhe ndihmojnë zhvillimin ekonomik”, tha ai.