Komuna e Drenasit, me datën 21.09.2018 ka pranuar një njoftim me numër të protokollit 01-070-56861 ne të cilin përfaqësues të fshatit Abri, Gjegjicë dhe Godanc, kanë paralajmëruar protestë para Komunës për mos hapjen e paraleleve të fuzionuara në këto tri fshatra, bëhet e ditur përmes një komunikate për media.

“Të gjitha protestat e qeta dhe demokratike mund të zhvillohen pasi që një gjë e tillë është e garantuar me Kushtetutën e Republikës së Kosovës dhe të gjitha ligjet e aplikueshme ne vend, deri sa të njëjtat nuk e pengojnë zhvillimin e punës normale në administratën komunale. Komuna ka vepruar sipas ligjeve në fuqi dhe protestat e paralajmëruara janë të panevojshme dhe nuk i ndihmojnë demokracisë, vetëm sa pengojnë dhe vonojnë procesin mësimor për nxënësit e paraleleve të fuzionuara”, thuhet në komunikatë.

Edhe një herë, Komuna e Drenasit, fton të gjithë prindërit t’i lejojnë fëmijët e tyre që të vazhdojnë procesin mësimor dhe mos të ndikohen politikisht, sepse, thotë se, një vendim i marr nga Drejtoria Komunale e Arsimit është i pakthyeshëm dhe është i mbështetur fuqimisht në ligjet e aplikueshme në Kosovë dhe i njëjti nuk ka asnjë bazë ligjore të kundërshtohet.

DKA-ja, ka siguruar transportin e nxënësve për të gjitha paralelet e fuzionuara për të ndjekur mësimin në shkollat amë, ndaj nuk ka asnjë arsye që të pengohet procesi mësimor përmes protestave dhe pengimin e nxënësve nga prindërit, pasi që ata që pësojnë më së shumti, janë nxënësit, kur dihet se ka kaluar edhe java e tretë kur ka filluar viti shkollor 2018/2019 dhe ata ende nuk vijojnë mësimin.