Pas mjekëve dhe policëve, edhe ushtarët e FSK-së pritet të shpërblehen për angazhimin e tyre

Prishtinë | 28 Mar 2020 | 20:52 | Nga Ekonomia Online

Mjekët, policët e zjarrfikësit do të shpërblehen me nga 300 euro shtesë për angazhimin e tyre të shtuar gjatë periudhës së pandemisë së koronavirusit.

Kjo u bë e ditur nga ministria e Financave, por që jashtë kësaj pakoje mbetën ushtarët e FSK-së.

E për ushtarët, zv/ministri i Mbrojtjes, Enver Dugolli ka thënë se do të bëhet një zgjidhje.

Me anë të një postimi në Facebook, ai ka thënë se do të prezentohet një listë e pjesëtarëve të FSK-së dhe kapacitetet e angazhuara në luftën kundër koronavirusit.

“Ministria e Mbrojtjes, do hartojë dhe prezantojë listën e pjesëtarëve të FSK-së dhe kapacitetet e angazhuara kundër COVID-19, që të përfshihen në pakon financiare mbështetëse të prezantuar nga Ministri i Financave dhe Transferëve, z.Besnik Bislimi”, ka shkruar ndër të tjera ai.

Postimi i plotë i Dugollit në Facebook:

Një sqarim për ushtarët e FSK-së:

Desha të siguroj të gjithë ushtarët e FSK-së që kanë qenë të angazhuar në aktivitetet mbështetëse në parandalimin e përhapjes së Corona Virusit COVID-19, se në asnjë mënyrë nuk do mbesin jashtë vemendjes së Qeverisë.

Ministria e Mbrojtjes, do hartojë dhe prezantojë listën e pjesëtarëve të FSK-së dhe kapacitetet e angazhuara kundër COVID-19, që të përfshihen në pakon financiare mbështetëse të prezantuar nga Ministri i Financave dhe Transfereve, z.Besnik Bislimi.

Të ngjashme