Ndërtimi i xhamisë ka ndarë në dysh banorët e fshatit Llugaxhi të Komunës së Lipjanit.

Mirëpo, problemet e tyre janë thelluar edhe më shumë derisa këshilli i xhamisë së fshatit ka iniciuar një padi ndaj 12 bashkëvendësve të tyre, të cilët patën kundërshtuar ndërtimin e kësaj xhamie.

Sami Retkoceri ka thënë se organet e drejtësisë do të merren me lëndën e padisë pasi që 12 persona kanë dëmtuar gur themelin e xhamisë në vlerë prej 6 mijë eurosh, raporton KTV.

Sipas tij, peticioni për ndërtimin e xhamisë e ka tejkaluar peticionin tjetër të kundërt.

Selatin Retkoceri, njëri ndër kundërshtarët e kësaj xhamie, ka thënë se dëmtimi i gur themelit është bërë pasi që punimet kishin filluar pa ndonjë leje nga Komuna dhe shton se andaj padia nuk ka ndonjë bazë juridike.

Edhe Arsim Reçica, i cili po ashtu është paditur, ka thënë se do ta kundërshtojë deri në fund këtë projekt.

Zëdhënësi i Komunës së Lipjanit, Diamant Bytyqi, ka konfirmuar se banorëve të fshatit Llugaxhi i është ndarë lokacioni për ndërtimin e xhamisë, siç e kanë kërkuar dhe i është dhënë leja ndërtimore.