Policia e Kosovës ka publikuar fotografi të personave të dyshuar për sulmin fizik ndaj drejtorit të gazetës online “Insajderi”, Parim Ollurit. Policia përmes një komunikate për media ka kërkuar ndihmën e qytetarëve për identifikimin e këtyre personave.

“Në bashkëpunim me prokurorinë përkatëse po kërkojmë përkrahjen e qytetarëve për identifikimin e personave të dyshuar”, thotë Policia, transmeton Gazeta Express.

Sulmi ndaj Ollurit kishte ndodhur në rrugën “Bajram Kelmendi” në Prishtinë, afër banesës së tij, gjatë muajit gusht. Më pas Olluri kishte pranuar edhe tretman mjekësor në QKUK.

Në momentin e sulmit, ai ka qenë i shoqëruar nga e fejuara e tij.

“Referuar rastit Lëndim trupor, që ka ndodhur me datën 16.08.2017, në rrugën “Bajram Bahtiri” në Prishtinë, Policia e Kosovës pas zgjerimit të rrethit të hetimit ka arritur të sigurojë xhirime dhe imazhe ku shihen tre persona të cilët dyshohet të kenë marrë pjesë në rastin e sulmit ndaj gazetarit Parim Olluri.

Në bashkëpunim me prokurorinë përkatëse po kërkojmë përkrahjen e qytetarëve për identifikimin e personave të dyshuar.

Andaj të gjithë ata që kanë informacion lidhur me personat e dyshuar dhe vendndodhjen e tyre i lusim që informacionet e tilla përmes numrit 192, t’ia kalojnë policisë ashtu që të mundësohet kapja e tyre”, thuhet në komunikatën e Policisë.