Ndarja e ndihmave për të gjitha federatat anëtare të komitetit olimpik, u kritikua paksa nga disa opinionistë futbolldashës, pasi sipas tyre futbolli është sport më i kushtueshëm sesa të tjerët.

Megjithatë, në një prononcim për GazetaBlic, ministrja në detyrë e MKRS’së, Vlora Dumoshi tha se ndihmat e dhëna për federatat ishin më të mirat në rajon, duke mos harruar as pakon prej 5 milionë eurosh e cila do të ndahet më vonë për të gjithë digasterët e ministrisë që ajo drejton.

“Nuk e di nëse kanë qenë të shumtë ata opinionistë që e kanë kritikuar këtë pako, por e vërteta është se ndihma që ne kemi dhënë si ministri për të gjitha federatat dhe forma e ndarjes është më e mira në rajon. Merrni analizoni dhe do të shihni. Ne kemi marrë lëvdata të shumta nga kreu i komitetit olimpik, Besim Hasani, teksa elozhetë nuk kanë munguar as nga krerët e të gjitha federatave”, tha fillimisht Dumoshi.

Ndërsa, sa i përket pakos prej 5 milionë euro që qeveria ka ndarë për këtë ministri dhe për gjasat që aktivitetet sportive të rikthehen, ajo u shpreh:

“Tashmë kemi bërë hapat e parë, ku kemi organizuar një grup-punues që do merret enkas me këtë çështje. Kjo do të jetë në formë të granteve, për secilën degë të ministrisë, kurse sa i përket rikthimit të aktiviteteve sportive, e gjitha do të varet nga vendimet e qeverisë, pasi siç edhe e shihni, lufta ndaj pandemisë momentalisht është parësore, andaj atje duhet të jetë synimi ynë kryesor, ku edhe shpresojmë që të ketë numër sa më të vogël të të prekurve”, përfundoi Dumoshi.