Zëdhënësi i AAK-së, Lulëzim Blaka, ka deklaruar se Kosova është shndërruar në ricikluese të figurave leniniste.

Blaka ka reaguar në Facebook pas shkrimit ofendues kundër Haradinajt, të kandidatit për deputet të VV-së Hysamedin Feraj. Blaka tha se Feraj vazhdimisht ka nxitur përçarje e vëllavrasje.

“Dikur punëtor i Institutit Marksist-Leninist, më pas aktivist “konservativ” dhe “monarkist”. Autori i “Skicës së mendimit…”, prej se e ka zbuluar fytyrën e tij të vërtetë, ka luajtur vetëm një rol: nxitjen e përçarjes dhe vëllavrasjes.”, ka shkruar Blaka.

Blaka ka thënë se Feraj është i trajnuar mirë për të ndjekur “liderin” deri në servilizëm dhe se nuk është i vetmi që ka nxitur përçarjen.

“Jo i vetmi i sojit të tij që paralajmëronte “përplasje qytetare” term i zbutur për luftën civile”, ka shkruar Blaka.

“Fatkeqësisht Kosova është shndërruar në ricikluese të figurave leniniste”, e mbyll Blaka shkrimin e tij.

Ndryshe, Hysamedin Feraj njihet si personazh kontravers, pasi që formimi i tij politik ka ndodhur në Institutin Marksist-Leninist të Tiranës, ndërsa pas rënies së komunizmit u bë nënkryetar i partisë së “Rimëkëmbjes”, parti e cila përkrahte politika të djathta dhe po ashtu kthimin e monarkisë.
Pas vitit 2008, Feraj bashkohet me Vetëvendosjen, një lëvizje e së majtës ekstreme dhe njihet si njeri i parë që ka nxitur tema kundër heroit kombëtar Gjergj Kastrioti Skënderbeu, si dhe ka paralajmëruar disa herë nëpër shkrimet e tij se do të ketë “përplasje qytetare” në Kosovë. I njëjti edhe pse kishte proklamuar për shumë vite “bashkimin kombëtar” ka sulmuar ashpër luftën e UÇK-së dhe bartësit e saj.