Fotoja e fundit që ajo postoi ditën e djeshme në Instagram bëri xhiron e portaleve shqiptare.

Mbi të gjitha fakti që Klaudia Pepa, e quajti mashkullin misterioz në foto: “Princi im”, ngriti edhe më shumë dyshimet rreth identitetit apo lidhjes që mund të ketë mes të dyve. Le ta pranojmë hapur, që jeta private kuriozon gjithmonë kur bëhet fjalë për personazhet publik, e Klaudia Pepa është një prej tyre. Është gjithmonë në fokus të medias rozë për gjithçka ka lidhje me çështjet e saj të zemrës apo dashurisë. Por, është momenti të marrim frymë thellë dhe të qetësohemi, pasi vetëm sot balerina e famshme shqiptare na sqaroi të gjithëve.

E kontaktuar nga Class, në lidhje me mashkullin që ajo e quan “Princi im”, Klaudia tregon se nuk ka asnjë lidhje speciale mes të dyve, përveç raportit profesional. Djali në foto është kolegu i saj balerin, dhe ai quhet Francesco Mariottini.  Ajo thotë më tej: “Unë jam në pritje të videos së re të kërcimit që bën pjesë në grupin e emrit tim, pra bëhet fjalë për shkronjën U. Siç e dini unë jam duke realizuar videot e kërcimit që kanë lidhje me shkronjat e emrit tim, Klaudia. Deri tani kam bërë videot e gërmave K, L, A, dhe kjo e radhës është U-ja. Këtë herë do të jetë një passo a due romantike me një princ, që kam dashur ta quaj princi im sepse historia e videos është e tillë. Një vajzë që humbet mendjen pas një kamarieri në një bar dhe e ëndërron atë si princin e saj të kaltër…Kjo është historia”.

Dhe me këtë shpjegim, Klaudia më në fund na sqaroi të gjithëve në lidhje me Princin, për të cilin po flitet kaq shumë në media prej ditës së djeshme!