Hetuesit e Prokurorisë Speciale të Kosovës kanë filluar hetimet për tenderin 20-milionësh të Korporatës Energjetike të Kosovës (KEK), për riparimin e shiritave magjistralë të qymyrit “TC Kosova B”, nën dyshimin se ka pasur parregullsi gjatë procedurave tenderuese.

KEK-u ende nuk e ka nënshkruar kontratën me konsorciumin boshnjak “ELCOM dhe ALTA”, të cilën e ka rekomanduar për kontratë, edhe pse ka marrë dritën jeshile nga Organi Shqyrtues i Prokurimit.

Ky i fundit i kishte dhënë të drejtën KEK-ut me gjithë ankesën që konsorciumi gjermano-kosovar “Fam & Ekoinvest” kishte bërë kundër vendimit të KEK-ut. Edhe pse ka konstatuar se ka pasur shkelje, OSHP-ja e autorizon KEK-un që të vazhdojë me procedurat të tjera tenderuese, duke vlerësuar se “devijimet nga kompania fituese janë të vogla”.

Fillimi i hetimeve nga Prokuroria Speciale është bërë pas një letre të hapur të kompanisë “Fam dhe Ekoinvest” drejtuar institucioneve relevante për shkeljet ligjore gjatë procesit të prokurimit të udhëhequr nga KEK-u e të vazhduara edhe nga OSHP-ja. (Koha Ditore)