Qeveria e Ramush Haradinajt ka dështuar të kursejë buxhetin e shtetit pasi që nuk arriti që të bënte kategorizimin e veteranëve të luftës, ashtu siç kërkohet me Ligjin për ndryshimin dhe plotësimin e Ligjit për veteranët e luftës së Ushtrisë Çlirimtare të Kosovës.

Arsye për këtë, sipas Qeverisë, është se që nga 5 tetori i 2017-s ajo nuk e posedon Arkivin e kategorisë së lirisë. Ky arkiv, sipas saj, i është dorëzuar Prokurorisë Speciale për hetime dhe se i njëjti nuk është kthyer në administrimin e Zyrës për çështjet e kategorive të dala nga lufta, shkruan Koha Ditore.

“Duke mos poseduar arkivin është në pamundësi zbatimi i kategorizimit”, thuhet në përgjigjen e Qeverisë.

Derisa ka arsyetuar veten për mospërmbylljen e këtij procesi, Ekzekutivi në dorëheqje ka fajësuar ish-Qeverinë Mustafa për mospunë. “Qeveria e kaluar nuk e ka zbatuar kategorizimin që parashihej në ato amendamente”, thuhet në përgjigjen e saj.