Nënkryetari i Komunës së Lipjanit, Diamant Bytyqi së bashku me drejtorin e Shëndetësisë dhe Mirëqenies Sociale së kësaj komune, Shkelzen Hajdini  kanë pranuar nga shoqata “Swiss Barakah”, një donacion me kondicionerë për Qendrën e Mjekësisë Familjare, raporton Ekonomia Online.

Hajdini ka thënë se ky donacion ka qenë mjaftë i nevojshëm për këto dy fshatra, sepse sipas tij ndikon në shëndetin e pacientëve dhe në lehtësimin e punës së ekipit mjekësor.

“Ky donacion është shumë i rëndësishëm në komunitetin në fshatit Dobrajë dhe Magure. Pacientët e këtyre fshatrave por jo vetëm, po flasim për gjashtë klima në Magure kurse tri në Dobrajë të Madhe. Ky donacion është shumë i rëndësishëm për shëndetin publik në shëndetin e pacientit në përmirësimin e kushteve për marrjen e shërbimeve të pacientëve, por edhe përmirësimin e kushteve të punës për personelin shëndetësor që punojnë në këto dy qendra të mjekësisë familjare. Në shikim të parë duket projekt i vogël por me ndikim të madh sepse është e rëndësishme që të ofrohen kushtet optimale për ofrimin e shërbimit shëndetësorë, në theks të veçantë për personat e moshës së shtyrë sepse duhet të ketë kushte të mira për pacientë”, ka thënë ai.

Ndërsa përfaqësuesi i fondit “Begatia” në kuadër të shoqatës “Swiss Barakah”, Ardian Mehmetaj, ka thënë se në këtë vapë të mashe këto kondicionerë kanë qenë mjaft të nevojshme për pacientët dhe mjekët.

“Sot kemi sjellë një donacion mjaftë të rëndësishëm për pacientët në këto dy qendra. Këta kondicionerë janë shumë të rëndësishëm sepse ndihmon pacientët ne këtë qendër të mjekohen por njëkohësisht ndihmon edhe në lehtësimin e punës së mjekëve. Mendoj që është një donacion i mirë kemi qenë në bashkëpunim me komunën por edhe me qendrën këtu për të pare se sa është i vlefshëm ky donacion. Besoj që kjo qendër ka nevojë për klima sepse po përballemi me vapa por kjo mund të përdorët edhe për dimër, ku dhe kursehet energjia elektrike më shume”, ka thënë Mehmetaj.