Pas publikimit të një lajmi në portale të ndryshme kinse anëtari i Këshillit Drejtues Lirak Çelaj kërkon zëvendësimin e kryetarit të PDK-së, Kadri Veseli, sot ka reaguar me një shkrim në rrjetin social, ku thekson se Kadri Veseli është dhe duhet të mbetet kryetar i PDK-së, ashtu siç kishte deklaruar edhe në mbledhjen e atij Këshilli ditë më parë.

Çelaj ka deklaruar se “nuk është e rastësishme që hapen lajme të tilla të rreme dhe janë të sponsorizuar pikërisht nga ata që ndihen të rrezikuar nga reformat thelbësore që kërkoj unë”, duke ritheksuar se kërkesat e tij nuk kanë të bëjnë me individët por me parimet, duke i renditur disa nga kërkesat e parashtruara.

Postimi i plotë i z. Çelaj:

Kadri Veseli është dhe duhet të mbetet kryetar i PDK-së

Lajmi qe është publikuar në disa portale është i pavërtetë, se unë gjoja kam kërkuar që të largohet z. Kadri Veseli dhe të vije dikush tjetër në vendin e tij.

Unë vazhdimisht e kam potencuar edhe ne media por edhe ne mbledhje të Këshillit Drejtues të PDK-së se z. Kadri Veseli është dhe duhet të mbetet kryetarë. Unë e çmoj shumë z. Veseli dhe konsideroj që është njeri me shumë vlera dhe i cili ka bërë shumë për Kombin dhe për vendin.

Mendoj që nuk është e rastësishme që hapen lajme të tilla të rreme dhe janë të sponsorizuar pikërisht nga ata që ndihen të rrezikuar nga reformat thelbësore që kërkoj unë. Aparaqikët e partisë nuk dinë gjë tjetër përveç të merren me shpifje. Ky lajm i rrem i ka rrënjët nga ata që kanë uzurpuar pozitat dhe kanë frikë nga demokratizimi i partisë sepse ata do të humbnin edhe privilegjet që i kanë sot e kësaj dite

Kërkesat e mija nuk kanë të bëjnë me individët por me parimet. Po e ritheksoj se disa nga kërkesat e mia janë:

1. Të marr përgjegjësi dikush për rezultatin e dobët të 14 shkurtit

2. Të demokratizohet partija që është kapur nga individ.

3. Të kemi një kryesi e cila del nga votat e Këshillit Drejtues ashtu siç e parasheh statuti i partisë.

4. Të përcaktohet qartë orientimi ynë duke marr parasysh platformën që ka pasur UÇK e disa nga to janë:

a. Kombi të trajtohet si një pavarësisht kufijve se ku shtrihet

b. Të deklarohet qartë orientimi ynë perëndimor

c. Të ruhet laiciteti i vendit

Këto janë disa prej kërkesave të mija. Dhe po ritheksoj se nuk jam i orientuar në përkrahja apo kundër individët e as grupacioneve, përkundrazi jam për qartësim të ideve dhe kushdo që i ka këto ide do ta ketë edhe përkrahjen time.