Drejtori i Shërbimit Spitalor Klinik dhe Univeristar të Kosovës, Basri Sejdiu, ka mbajtur konferencë për media, në të cilën ka folur për reformat që janë duke ndodhur në institucionet publike shëndetësore në Kosovë.

Me këtë rast, Sejdiu ka folur edhe për shtretërit që janë blerë për klinikat e QKUK-së, me qëllim të përmirësimit të kushteve për pacientët.

Duke folur për funksionalitetitin e tyre, Sejdiu ka thënë se të gjithë shtretërit të cilët janë blerë janë me standarte evropiane dhe të cilët kanë përmirësuar ndjeshëm hospitalizimin e pacientëve në QKUK.

“Ne nuk kemi mundur t’i lëmë qytetarët akoma në shtretër me blloqe e dyshekë të vjetër të cilët kanë dekada që nuk janë ndërruar. Prandaj kemi reaguar menjëherë, duke blerë shtretër modern, me standarte evopriane dhe të cilët kanë përmirësuar shumë hospitalizimin e pacientëve tanë”, ka thënë Sejdiu.

Duke folur për transportimin e pacientëve nga një repart në tjetrin së bashku me shtrat, ai ka treguar se edhe për këtë kanë menduar zgjidhje.

“Ne krahas shtretërve për shtrim të pacientëve, kemi blerë edhe dhjetëra shtretër transportues të cilët do të përdoren për bartjen e pacientëve nga një repart në tjetrin, atëherë kur paraqitet nevoja”, ka shpejguar ai.

Më tej, ai ka thënë se shtretërit janë blerë të dimensioneve të ndryshme dhe u janë shpërndarë të gjitha klinikave.

“Për shkak të specifikave të patologjive, ne kemi blerë shtretër me disa thyerje në mënyrë që pacienti të ketë mundësi t’i përshtasë qëndrimin e trupit ashtu siç ka nevojë”, ka thënë Sejdiu.

Sidoqoftë, drejtori i ShSKUK-së ka thënë se blerja e shtretërve do të vazhdoj edhe në vitin 2019.

“Këtë vit kemi blerë 750, kurse vitin tjetër synojmë që të blejmë edhe 1300 të tjerë. Do të blejmë shtretër edhe për Spitalet e Përgjithshme. Janë ditë të mira këto që po vijnë për shëndetësinë kosovare pasi që shumë reforma po ndodhin në të njëjtën kohë”, ka shtuar Sejdiu.

Ai ka përmendur edhe investimet që do të ndodhin për rinovimin e klinikave të QKUK-së, për transformimin e këtij institucioni në një institucin modern spitalor.