Shtetet e Bashkuara dhe Kina, dy ndotësit më të mëdhenj të karbonit në botë, ranë dakord të bashkëpunojnë për të frenuar ndryshimet klimatike me urgjencë, vetëm disa ditë para se presidenti Joe Biden të organizojë një samit virtual të liderëve botërorë për të diskutuar çështjen, njofton AP.

Marrëveshja u arrit nga i dërguari special i SHBA-së për klimën John Kerry dhe homologu i tij kinez Xie Zhenhua gjatë dy ditëve të bisedimeve në Shanghai javën e kaluar, sipas një deklarate të përbashkët.

Të dy vendet “janë të angazhuara për të bashkëpunuar me njëri-tjetrin dhe me vendet e tjera për të trajtuar krizën e klimës, e cila duhet të adresohet me seriozitetin dhe urgjencën që ajo kërkon”, thuhet në deklaratë.

Kina është emetuesi më i madh në botë i karbonit, i ndjekur nga Shtetet e Bashkuara. Të dy vendet “prodhojnë” gati gjysmën e tymrave të karburanteve fosile që po ngrohin atmosferën e planetit. Bashkëpunimi i tyre është çelësi për një sukses të përpjekjeve globale për të frenuar ndryshimin e klimës, por lidhjet e dobëta për të drejtat e njeriut, tregtinë dhe pretendimet territoriale të Kinës ndaj Tajvanit dhe Detit të Kinës Jugore kanë kërcënuar të minojnë përpjekje të tilla.

Biden ka ftuar 40 udhëheqës botërorë, përfshirë presidentin kinez Xi Jinping, në samitin e 22-23 prillit. SHBA dhe vendet e tjera pritet të shpallin objektiva më ambiciozë kombëtarë për uljen e emetimeve të karbonit përpara ose në takim, së bashku me premtimin e ndihmës financiare për përpjekjet e klimës nga kombet më pak të pasura.

Është e paqartë se sa vizita e Kerryt në Kinë do të promovonte bashkëpunimin SHBA-Kinë për çështjet e klimës.

Sipas deklaratës SHBA-Kinë, të dy vendet do të përmirësojnë “veprimet e tyre përkatëse dhe bashkëpunimin në proceset multilaterale, përfshirë Konventën në kuadër të Kombeve të Bashkuara për Ndryshimin e Klimës dhe Marrëveshjen e Parisit”.

Kerry shtoi se të dy vendet gjithashtu synojnë të zhvillojnë strategjitë e tyre përkatëse afatgjata përpara konferencës së Glasgowit dhe të ndërmarrin “veprime të përshtatshme për të maksimizuar investimet dhe financat ndërkombëtare në mbështetje të” tranzicionit të energjisë në vendet në zhvillim.

Xi njoftoi vitin e kaluar se Kina do të ishte neutral i karbonit deri në vitin 2060 dhe synon të arrijë një kulm në emetimet e saj deri në vitin 2030. Në mars, Partia Komuniste e Kinës u zotua të ulë emetimet e karbonit për njësi të prodhimit ekonomik me 18% gjatë pesë viteve të ardhshme, në përputhje me qëllimin e tij për periudhën pesë-vjeçare të mëparshme. Por ambientalistët kanë thënë se Kina duhet të bëjë më shumë.

Bideni është zotuar se SHBA-të do të kalojë në një sektor të energjisë pa emisione brenda 14 viteve dhe do të ketë një ekonomi tërësisht pa emisione deri në vitin 2050. Kerry po shtyn gjithashtu kombet e tjera që të angazhohen për neutralitetin e karbonit deri atëherë.