Ushtria amerikane ka deklaruar se Ngushtica e Hormuzit vazhdon të mbetet e hapur për qarkullimin detar, pavarësisht pretendimeve të Iranit për mbylljen e saj.

Sipas Komandës Qendrore të Shteteve të Bashkuara, forcat amerikane po monitorojnë nga afër situatën në një nga rrugët ujore më strategjike në botë, për të siguruar vazhdimësinë e lëvizjes së anijeve.

“Irani nuk e kontrollon Ngushticën e Hormuzit. Trafiku detar vazhdon të rrjedhë dhe forcat amerikane po e ndjekin situatën për të siguruar që kjo të vazhdojë”, ka deklaruar zëdhënësi i Komandës Qendrore të SHBA-së, kapiteni i marinës Tim Hawkins.

Deklarata vjen pasi Korpusi i Gardës Revolucionare Islamike të Iranit njoftoi më herët se kishte mbyllur Ngushticën e Hormuzit dhe paralajmëroi anijet që të mos i afroheshin zonës. Kjo ka rritur shqetësimet ndërkombëtare për stabilitetin e rrugëve detare dhe për mundësinë e përshkallëzimit të tensioneve në rajon.

Ngushtica e Hormuzit konsiderohet një nga korridoret më të rëndësishme energjetike në botë, përmes së cilës kalon një pjesë e madhe e naftës globale.