Ora 07:00 shënon hapjen e procesit të votimit deri në orën 19:00, kohë në të cilën qytetarët shqiptarë do të vendosin se kush do t’i qeverisë për katër vitet e ardhshme.

Komisioni Qendror i Zgjedhjeve në Shqipëri bënë me dije se deri në ora 12:00 kanë votuar 27.18 për qind.

Sipas KQZ-së, pjesëmarrje më të madhe ka në qarkun e Tiranës prej 31.97 për qind, ndërsa më së paku është ai i qarkut të Vlorës me 14.69 për qind.

Presidenti i Shqipërisë, Ilir Meta iu ka bërë thirrje gjithë qytetarët të dalin për të votuar në zgjedhjet e sotme.

Pasi shfrytëzoi të drejtës kushtetuese, i pari i shtetit në Shqipëri, tha se ky është akti më patriotik që mund të bëjnë qytetarët.

“Punën më të rëndësishme sapo e realizova, i ftoj të gjithë të votojnë. Votimi nuk vetëm një detyrim qytetarë, nuk është vetëm një e drejtë kushtetuese demokratike. Sot është një akt patriotik, mbrojta e atdheut. Sot atdheu mbrohet me votë dhe sjellje të qytetëruar evropiane”, tha ai.

Edhe kryeministri Edi Rama, i shoqëruar nga bashkëshortja e tij, Linda Rama kanë ushtruar të drejtën e votimit, në qendrën e votimit në Surrel.

Rama pas votimit ka dhënë një deklaratë për mediet duke thënë se sot është një ditë e rëndësishme dhe të gjithë duht të dalin në votime.

“Sot është një ditë shumë e bukur, një diell fantastik dhe sot është dita që sot mos ushqejmë asnjë ndjenjë negative ndaj askujt që me votën e vetë shpreh një opinion tjetër. Mos të harrojmë sot dhe asnjëherë se jemi një familje e madhe në të njëjtin atdhe. Askush mos harrojë se demokracia është një sport pa spektator dhe secili duhet të zbresë vetë në fushë dhe të gjuajë me votë. Kështu që zbrisni në fushë, gjuajeni penalltinë tuaj dhe fitoftë më i miri“, tha Rama.

Po ashtu, kryetari i Partisë Demokratike, Lulzim Basha votoi në qendrën e votimit në Kopshtin numër 13.

Në deklaratën për medie, Basha u shpreh se dita e sotme ishte një ditë e historike për vendin.

“Është dita kur të gjithë shqiptarët kanë fuqinë në duart e tyre”, tha kryedemokrati teksa theksoi se sot duhet votuar masivisht për kombin, familjen dhe fëmijët.

Kurse, kryetarja e Lëvizjes Socialiste për Integrim, Monika Kryemadhi ka votuar mëngjesin e sotëm në Kopshtin 31 në Bllok.

“Ditë të kollajshme dhe mbarësi. Bëj thirrje për votime të qeta. Iu uroj suksese shumë kandidatëve, e bindur se fitorja do të jetë e patjetërsueshme”, tha Kryemadhi.

3,588,869 persona me të drejtë vote në Shqipëri, do të kenë mundësi që të zgjedhin deputetët që do të përfaqësojnë vullnetin e tyre në Kuvendin e Shqipërisë.

Për 140 vende në Parlamentin shqiptar garojnë 1841 kandidatë nga 13 parti, koalicione apo të pavarur, ku prej tyre 39.76 për qind ose 732 janë kandidate femra.