Shërbimi Spitalor dhe Klinik Universitar i Kosovës, ka ndërmarrë të gjitha hapat e nevojshëm duke bërë përgatitjet e nevojshme për klinikat vijës së parë të kontaktit me pacientë, (Klinika Emergjente, Klinika e Sëmundjeve Ngjitëse, Klinika e Pediatrisë), për të përballuar dhe menaxhuar situatën me rastet e dyshuara me Coronavirus. ​

Sipas një njoftimi të ShSKUK është thënë se këto institucione janë furnizuar dhe janë në proces të furnizimit me mjete mbrojtëse, duke përfshirë maska adekuate, syza mbrojtëse, uniforma mbrojtëse dhe materiale tjera të nevojshme për punë me pacientë të dyshimtë dhe të infektuar me virusin Covid -19.

“Po ashtu, institucionet janë furnizuar dhe janë në proces të furnizimit me barna dhe dezinfektues për duar dhe hapësira. QKUK, ka 20 respiratorë rezervë dhe mund të futen në funksion në raste nevoje. SHSKUK po e përcjell gjendjen nga afër, ka rritur nivelin e gatishmërisë në secilin nga institucionet që i ka në menaxhim.”. është thënë në njoftim.