Një kamikaz e ka kryer një sulm me makinën e tij të mbushur me eksplozivë në kryeqytetin sirian, Damask, dhe i ka vrarë të paktën tetë persona, raporton televizioni shtetëror sirian.

Policia siriane i ka ndjekur tre të dyshuar me makina-bombë, të cilët po tentonin të hynin në kryeqytet, transmeton Express. Policia ia ka dalë t’i ndalte dy makina, por e treta është futur në sheshin “Tahrir” në lindje të qytetit dhe e ka hedhur veten në erë pasi që ishte rrethuar.

Siria ndodhet midis një lufte civile tashmë gjashtëvjeçare, me Damaskun që ende është kryesisht nën kontrollin e qeverisë.

Të paktën 12 persona u plagosen në këtë sulm. Televizioni shtetëror raporton se sulmuesit kishin planifikuar t’i bombardonin zonat e mbipopulluara në kryeqytet në ditën e parë të punës pas muajit të shenjtë të Ramazanit.