Kryetari i Komunës së Suharekës, Bali Muharremaj, dhe homologu i tij nga Mamusha, Abdulhadi Krasniq, të martën janë pajtuar që prej vitit të ardhshëm të intensifikojnë bashkëpunimin ndërkomunal.

Sipas tyre, krahas projekteve të interesit të përbashkët në infrastrukturë do të ketë shkëmbime edhe sa u përket shërbimeve shëndetësore të nivelit parësor, shkruan sot “Koha Ditore”.

Zyra për Informim e Komunës së Suharekës ka bërë të ditur se dy komunat do të bashkëpunojnë në shumë segmente.

Kryetarët e këtyre komunave janë dakorduar që të rrisin bashkëpunimin dhe të realizojnë projekte të përbashkëta në shumë segmente.

“Ndër temat që kemi diskutuar ka qenë rregullimi i infrastrukturës, përkatësisht rregullimi i rrugëve që lidhin dy komunat përkatëse. Po ashtu, kemi diskutuar që qytetarët e dy komunave të marrin shërbime shëndetësore të nivelit parësor në të dy komunat”, ka thënë Krasniq.